Curiya kuchni ko‘rsatish uchun joy emas – Erdo‘g‘an 

Turkiya Suriyaning kuchni ko‘rsatish uchun joyga aylanayotganidan qattiq tashvish bildirmoqda. O‘z harbiy qudratiga tayanuvchi davlatlarning bunday yondashuviga yo‘l qo‘yib bo‘lmaydi, deb aytdi Turkiya prezidenti Rajab Toyyib Erdo‘g‘an. 

Erdo‘g‘anning aytishicha, Turkiya Suriyaga tinchlik va barqarorlik olib kelgan yagona davlatdir.

“Boshqa o‘yinchilar harakat qilayotgan Suriyaning boshqa barcha hududlarida zo‘ravonlik, beqarorlik va vayrongarchilik hukm surmoqda”, deb aytdi Erdo‘g‘an. Uning aytishicha, Anqaraning ta'siri uning tashqarisidan ancha yergacha yoyiladi. “Turkiya o‘zini birodarlariga yordamga kelishga, ularga dunyoning istalgan nuqtasida yordam qo‘lini cho‘zishga majbur, deb hisoblaydi”, deb ta'kidlab o‘tgan Turkiya prezidenti. 

Erdo‘g‘an “qotil Bashar Asad tuzumi”ni qo‘llab-quvvatlayotgan davlatlar siyosatini ham xato deb atagan. “Demokratik ittifoq” (PYD) terrorchilik tashkilotini qo‘llab-quvvatlayotganlar ham xato qilishmoqda. Turkiya Suriyadagi bu ikkita xavfga qarshi oxirigacha kurashadi”, deb aytgan Erdo‘g‘an. 

Erdo‘g‘an Anqara Suriyada to‘liq xavfsizlik ta'minlanguncha bu davlatda qolishini ta'kidlab o‘tgan.  

Erdo‘g‘anning ta'kidlashicha, ba'zi kuchlar PYD terrorchilarini “himoya qila olaman” deb yanglish o‘ylaydi. Uning aytishicha, Turkiya PYD’ning barcha jangarilarini baribir yo‘q qiladi. “Suriya va Iroqdagi spektaklni tugatish kerak. Niqoblar olib tashlanishi lozim”, deb aytgan Erdo‘g‘an.

Erdo‘g‘an Anqara shubhasiz ittifoqdosh davlatlar harbiylariga kuch ishlatmasligini ta'kidlab o‘tdi. “Shu bilan birga, biz hamkorlarimizga PYD terrorchilaridan uzoqlashishni qat'iyan tavsiya qilamiz”, deb ogohlantirgan Erdo‘g‘an.