Rasman! Venger «Arsenal»dan ketadi

«Arsenal» bosh murabbiyi Arsen Venger mavsum yakunida jamoadan ketishini ma'lum qildi..

«Uzoq o‘ylanishlar va klub rahbariyati bilan olib borilgan muzokaralardan so‘ng ushbu mavsum yakunlanganidan keyin jamoadan ketish vaqtim kelganini his qildim.

Uzoq yillar davomida shunday buyuk klubni boshqarganimdan minnatdorman. Klubga sadoqat va halollik bilan ishladim. Muxlislarimga, futbolchilarga, katta rahmat aytmoqchiman. Jamoaning ashaddiy fanatlariga esa faoliyatimni yuqori darajada tugatishimga zamin yaratib berishlarini so‘rab qolaman», - deya Vengerning so‘zlarini keltirgan klub matbuot xizmati.

Fransiyalik ushbu mutaxassis «Arsenal»ni 1996 yildan buyon boshqarib keldi. U o‘tgan vaqt davomida klub bilan jami 17 sovrin yutdi, shundan 3tasi Angliya chempionligi (1998, 2002, 2004), 7ta Angliya Kubogi (1998, 2002, 2003, 2005, 2014, 2015, 2017) va 7ta Angliya Superkubogi (1998, 1999, 2002, 2004, 2014, 2015, 2017). U Angliya premer-ligasida o‘yin o‘tkazish bo‘yicha rekord o‘rnatdi - u jamoasini APLning 823 o‘yinida maydonga boshlab tushdi. U bu borada «Manchester Yunayted»ning sobiq ustozi Aleks Fergyusonni (810) ortda qoldirgan.

22 yillik faoliyati davomida u «Arsenal» bilan barcha musobaqalar doirasida jami 1228 o‘yin o‘tkazdi, shundan 704tasida g‘alaba qozonildi. Jamoa 20 marta Chempionlar ligasida ishtirok etdi, faqat bir marta, 2005-2006 yilgi mavsumda finalda o‘ynadi va «Barselona»ga mag‘lub bo‘ldi.