«Siyosiy partiyalar to‘g‘risida»gi, «O‘zbekiston Respublikasi Oliy Majlisi Qonunchilik palatasining Reglamenti to‘g‘risida»gi, «O‘zbekiston Respublikasi Oliy Majlisi Senatining Reglamenti to‘g‘risida»gi, «Xalq deputatlari viloyat, tuman va shahar Kengashlariga saylov to‘g‘risida»gi va «Xalq deputatlari mahalliy Kengashi deputatini, O‘zbekiston Respublikasi Oliy Majlisining Qonunchilik palatasi deputatini va Senati a'zosini chaqirib olish to‘g‘risida»gi Qonunlarga tuzatishlar kiritildi (18.04.2018 yildagi O‘RQ-476-son Qonun). Bu haqda Norma yozmoqda.
 
Partiya guruhida – kamida 3 nafar deputat
 
Qoraqalpog‘iston Respublikasi Jo‘qorg‘i Kengesi va xalq deputatlari Kengashlarida siyosiy partiyalar manfaatlarini ifoda etish uchun partiya guruhlari tuzilmoqda. Aniqlashtirilishicha, ularning tarkibida kamida uch nafar – bir partiya a'zolari bo‘lgan tegishli vakillik organiga saylangan deputat bo‘lishi kerak.
 
Partiya guruhlari qo‘shimcha huquqlarga ega bo‘lishdi:

• hududlarni rivojlantirish dasturlarining loyihalarini takomillashtirish yuzasidan takliflar kiritish;
• tuman (shahar) hokimining, shuningdek tegishli mahalliy ijro etuvchi hokimiyat organlari mansabdor shaxslarining qoniqarsiz faoliyati to‘g‘risida Jo‘qorg‘i Kengesga, viloyat yoki Toshkent shahar hokimiga xulosa taqdim etish.
 
Saylovchilar bilan muloqot – yiliga 4 marta
 
Endi tegishli xalq deputatlari Kengashlari deputatlari saylovchilarni o‘z faoliyati to‘g‘risida ikki marta ko‘p ¬– yiliga kamida 4 marta xabardor qilishlari kerak (ilgari – yiliga kamida 2 marta).
 
Ammo ular nafaqat saylovchilarning ishonchini oqlash haqida, balki uni deputatlikka nomzod qilib ko‘rsatgan organ (siyosiy partiya) oldidagi o‘z majburiyatlarini bajarish to‘g‘risida ham qayg‘urishlari zarur, chunki endi uning taqdimnomasiga binoan u chaqirib olinishi mumkin (ya'ni uning vakolatlarini muddatidan oldin to‘xtatish). Bu Qonunchilik palatasi deputatlari va Senat a'zolariga nisbatan ham tatbiq etiladi.    
 
Joylardagi ishlarni deputatlar vakillari tashkil etadi
 
Siyosiy partiya Oliy Majlis Qonunchilik palatasining deputati bilan kelishilgan holda partiyaning tegishli saylov okrugidagi hududiy bo‘limi xodimlari orasidan (jamoatchilik asosida) vakil tayinlashi mumkin.