Ro‘za tutishdan maqsad nima?

Xabaringiz bor, KUN.UZ tahririyati Ramazoni sharif munosabati bilan yangi – “Islom nuri” dasturiga qo‘l urgan. Bu galgi ko‘rsatuvda “Ro‘za tutishdan murod nima?” ekanligi haqda so‘z boradi. Suhbatdoshimiz poytaxtdagi “Novza” jome masjidi imom xatibi Jaloliddin Hamroqulov bo‘ldi.

Youtube'da ko‘rish

Mover.uz'da ko‘rish

- Shu fursatdan foydalanib, aziz xalqimizni, mo‘min-musulmonlarni rahmat va mag‘firat oyi bo‘lgan Ramazon oyi bilan chin qalbimdan tabriklayman. Alloh bu oyni hammamizga, xonadonimizga barakali qilsin.

Ro‘za tutishdan murod nima, degan savolga javob beradigan bo‘lsak, uning javobini ro‘zani farz qilgan oyatdan topsak bo‘ladi. Alloh taolo Qur'oni karimda shunday deydi: “Ey iymon keltirganlar. Sizlardan avvalgi qavmlarga ro‘za farz qilinganidek, sizlarga ham Ramazonning ro‘zasi farz qilindi. Shoyadki, taqvodor bo‘lsalaringiz”.

Demak biz bu masalaning zohirini o‘ylab qarasak, aynan bu yilgi saratonga to‘g‘ri keladigan Ramazon oylarida inson ro‘za tutishni mashaqqatdek qabul qiladi. Ba'zi qalbi kasal bandalar: “Alloh bandalariga mehribon deysizlar-ku, ammo kunduzlari uzun, kechalari qisqa kunlarda ham ro‘za tutishga buyuradimi”, degan noto‘g‘ri tushunchalarni aytishadi. Aslida, bu Allohning rahmati.

Shu bilan birga, mo‘min-musulmonlar bir haqiqatni yaxshi bilishlari kerak – Ramazonning ro‘zasi bizdan oldin o‘tgan qavmlarga ham, payg‘ambarlarga ham farz qilingan. Xo‘sh, uni tutishdan maqsad nima? Ba'zilar ozish uchun, ba'zilar salomatlik uchun deb o‘ylashlari mumkin. Yoki Xudo aytgan ekan, ro‘zasini tutyapmiz-da, deyishlari mumkin. Lekin Alloh aytyaptiki, shoyadki Ramazonning ro‘zasini tutib taqvodor bo‘lsalaringiz...

Taqvo nima? Taqvo – bu Alloh taoloni ko‘rib turgandek o‘zini his qilish va oxirat diyoriga hozirlik ko‘rish. Bu, aslida, juda ham katta g‘oya. Chunki dinimizdagi barcha ibodatlarning xulosasi shu. Xoh iymon keltirgan musulmon sifatida bo‘lsin, xoh zakot beruvchi insonning xislati bo‘lsin yoki hajga boradigan insonning fazilati bo‘lsin, buning tub ma'nosi mana shu. Bunga quyidagi misolni keltirish mumkin:

Taqvo malakasida peshvo bo‘lgan inson Hazrat Umar (r.a) ba'zan yig‘lar ekanlar. Shunda u kishidan so‘rashar ekan: “Nega buncha o‘zingizni qiynaysiz?”. U kishi javob beribdilar: “Gardanimdagi mas'uliyat shunchalik og‘irki, anavi Dajla bo‘yida bir qo‘yni bo‘ri yeb ketsa, uning hisobini ertaga Xudo Umardan so‘raydi”.

Agar haqiqiy mo‘min-musulmon mana shu g‘oyalarni, falsafani, ya'nikim Ramazon ro‘zasini tutishdan maqsadni to‘g‘ri qabul qilsa, inshaolloh, Allohning taqvo malakasini hosil qiladi va bu dunyo saodatiga hamda oxiratda jannatdek mukofotga erishadi, - dedi Jaloliddin Hamroqulov.

Maqola O‘zbekiston Respublikasi Vazirlar Mahkamasi huzuridagi Din ishlari bo‘yicha qo‘mitaning xulosasi asosida tayyorlandi.