JSST rahbari Tedros Gebreyyesus O‘zbekistonga keladi

Shu yilning 21 mayidan boshlab, Shveytsariyaning Jyeneva shahrida Jahon sog‘liqni saqlash assambleyasining 71-sessiyasi o‘z ishini boshladi. Unda Sog‘liqni saqlash vaziri Alisher Shodmonov boshchiligida O‘zbekiston delegatsiyasi ham ishtirok etmoqda. 

Dunyoning turli mamlakatlari tajribasi bilan tanishish, ilg‘or amaliyotlarni o‘rganish va ularni hayotga tatbiq etish hamda aholi salomatligi bilan bog‘liq muammolarga samarali yechim topish mazkur nufuzli anjumanning maqsadlaridan biri bo‘ldi, deb xabar bermoqda Sog‘liqni saqlash vazirligi axborot xizmati. 

Bundan tashqari, JSTTga a'zo 194ta davlat, jumladan, O‘zbekiston delegatsiyasi ishtirok etayotgan mazkur sessiyada xalqaro tashkilotning sog‘liqni saqlash sohasi bo‘yicha kuzatilayotgan global muammolar va ularning yechimlari borasida muhokamalar o‘tkazildi. Bu yilgi sessiyada atrof-muhit va iqlim o‘zgarishlarining salomatlikka salbiy ta'siri va unga qarshi kurashish bo‘yicha yo‘l xaritasi, dori-darmon va vaksina ta'minoti, noinfeksion kasalliklar profilaktikasi, ayollar, bolalar va o‘smirlar salomatligini muhofaza qilish kabi masalalar bo‘yicha ma'ruzalar qilinmoqda.

Jyeneva safari davomida Sog‘liqni saqlash vaziri Alisher Shodmonov JSST Bosh direktori Tedros Gebreyyesus bilan ikki tomonlama alohida uchrashuv o‘tkazdi. O‘zaro muloqotlar chog‘ida O‘zbekistonda so‘nggi yillarda sog‘liqni saqlash tizimida olib borilayotgan islohotlar, aholiga ko‘rsatilayotgan tibbiy xizmatlar darajasining oshirilayotgani, shuningdek, sohada qabul qilinayotgan me'yoriy hujjatlar, istiqboldagi rejalar va dasturlar haqida ma'lumot berildi. 

Suhbat davomida T.Gebreyyesus mamlakatda prezident Sh.Mirziyoyev boshchiligida hayotga tatbiq etilayotgan barcha huquqiy hujjat va dasturlar aholiga g‘amxo‘rlikning barcha zarur jihatlarini qamrab olayotganligi, O‘zbekiston tibbiyot tizimida ham o‘zining oqilona strategiyasi, siyosati va ustuvor yo‘nalishlarini belgilab olganligi, islohotlarning yangi bosqichi bilan bog‘liq vazifalar amalga oshirilayotganligini e'tirof etdi va ushbu tarixiy voqealarning guvohi bo‘lish maqsadida shu yilning o‘zida O‘zbekistonga tashrif buyurishini bildirdi. Shuningdek, u O‘zbekiston va JSST o‘rtasida mamlakat manfaatlarini himoya qiluvchi ko‘p tomonlama o‘zaro hamkorlik aloqalarini rivojlantirishga har doim tayyor ekanligini ta'kidladi. 

Anjumanning 26 may kuni bo‘lib o‘tadigan so‘nggi kunida ushbu nufuzli xalqaro tashkilotga a'zo davlatlar vakillari tomonidan aholi salomatligini muhofaza qilish bilan bog‘liq muhim qarorlar qabul qilinishi kutilmoqda.