Qimmatbaho metallar va toshlar bilan ishlash huquqi yangicha tasdiqlanadi

• Qimmatbaho metallar va qimmatbaho toshlar bilan ishlashga ro‘yxatdan o‘tkazish guvohnomasi beriladigan ish turlari (faoliyat turlari guruhlari doirasida);
• Zargarlik buyumlari hamda qimmatbaho metallar va qimmatbaho toshlardan yasalgan boshqa buyumlarni sotishga ro‘yxatdan o‘tkazish guvohnomasi beriladigan savdo qilish turlari ro‘yxati;
• Qimmatbaho metallar va qimmatbaho toshlar bilan ishlashga ro‘yxatdan o‘tkazish guvohnomasi berishda idoralararo o‘zaro elektron hamkorlik qilish sxemasi.
 
Asosiy qoidalar
 
Agar ishlarning turlari tashkilotning yuridik shaxs maqomiga ega bo‘lmagan bir yoki bir nechta tarkibiy bo‘linmalari tomonidan amalga oshirilsa, bo‘ysunishida ushbu tarkibiy bo‘linmalar bo‘lgan tashkilot ro‘yxatdan o‘tkaziladi. Bunda ro‘yxatdan o‘tkazish guvohnomasi, tegishli bo‘linmaning rekvizitlari ko‘rsatilgan holda tashkilotga – yuridik shaxsga rasmiylashtiriladi va har bir tarkibiy bo‘linma uchun alohida beriladi.  
 
Amalga oshirilishiga ro‘yxatdan o‘tkazish guvohnomasi rasmiylashtirilgan faoliyat turlari guruhlari doirasidagi ishlar faqat ariza beruvchi tomonidan amalga oshirilishi mumkin. Berilgan ro‘yxatdan o‘tkazish guvohnomasi bo‘yicha huquqlarni boshqa shaxslarga berish taqiqlanadi.
 
Ro‘yxatdan o‘tkazish guvohnomasi faoliyatning muayyan turlariga (Ro‘yxatda nazarda tutilgan faoliyat turlari guruhlari yoki ularning qismlari doirasida) – ishlar turlarining bir guruhi doirasida beriladi. Ariza beruvchining xohishiga ko‘ra faoliyat turlarining turli guruhlarida nazarda tutilgan ishlarni amalga oshirishga ro‘yxatdan o‘tkazish guvohnomasi faoliyat turlarining har bir guruhiga alohida rasmiylashtiriladi.
 
Qimmatbaho metallar va qimmatbaho toshlar bilan ishlashga ruxsat berishdagi asosiy ruxsat berish talablari va shartlari quyidagilardan iborat:
 
• ariza beruvchida qimmatbaho metallar va qimmatbaho toshlar bilan ishlarni amalga oshirganda belgilangan talablarga mos mulkka egalik qilish huquqi yoki boshqa ashyoviy huquq asosida tegishli bo‘lgan binolar va inshootlar, ishlab chiqarish maydonlari mavjudligi;
• faoliyat ko‘rsatiladigan joylarda yong‘in xavfsizligi, sanitariya qoidalari, normalari va gigiyena normativlari, texnik mustahkamlik va materiallar, xom ashyo, tayyor buyumlarni saqlash qoidalari talablariga rioya qilish;
• qimmatbaho metallar bilan ishlarni amalga oshirish uchun zarur bo‘lgan moddiy-texnika bazasi, uskunalar va boshqa texnika vositalarining mavjudligi.
 
Ayrim turdagi ishlar uchun qo‘shimcha talablar nazarda tutilgan.
 
Ro‘yxatdan o‘tkazish guvohnomasini berish quyidagi asoslar bo‘yicha rad etilishi mumkin:

• ro‘yxatdan o‘tkazish guvohnomasini olish uchun zarur bo‘lgan ma'lumotlar ariza beruvchi tomonidan to‘liq bo‘lmagan hajmda taqdim etilishi;
• ariza beruvchining Nizomda nazarda tutilgan ruxsat berish talablari va shartlariga nomuvofiqligi;
• ariza beruvchi tomonidan ko‘rsatilgan ma'lumotlarda ishonchsiz yoki noto‘g‘ri ma'lumotlarning mavjudligi;
• Nizomga muvofiq o‘tkazilgan tekshirishlar yakunlari bo‘yicha xulosaning asosli ravishda salbiy bo‘lishi sabablarining mavjudligi.
 
Ro‘yxatdan o‘tkazish guvohnomasini berishning boshqa asoslarga, shu jumladan maqsadga muvofiq emasligiga ko‘ra rad etilishiga yo‘l qo‘yilmaydi. 
 
Qisqa tartib-taomil

Ishlarni amalga oshirish, shuningdek zargarlik buyumlari va boshqa buyumlar bilan savdo qilish turlariga ro‘yxatdan o‘tkazish guvohnomasini olish uchun ariza beruvchi Davlat xizmatlari ko‘rsatish markaziga shaxsan o‘zi borib yoki Yagona portal orqali ro‘yxatdan o‘tkazish guvohnomasini olish to‘g‘risidagi elektron shakldagi arizani beradi. 

To‘lov Internet tarmog‘i orqali real vaqt rejimida «SMS-axborotlash» xizmati ulangan bank kartasi bilan naqd pulsiz hisob-kitob qilish orqali, O‘zbekiston Respublikasi banklari kassalarida naqd pulsiz hisob-kitob qilish orqali, hisob raqamidan bank o‘tkazmalari yordamida amalga oshirilishi mumkin. Ariza beruvchi tomonidan 2 ta yig‘im to‘lanadi.

Asillik palatasi ariza berish usulidan qat'i nazar qabul qilingan arizani ko‘rib chiqadi, ro‘yxatdan o‘tkazish guvohnomasini beradi yoki uni berishni rad etadi va ariza qabul qilingan sanadan boshlab:

• ro‘yxatdan o‘tkazish guvohnomasini berish yoki amal qilish muddatini uzaytirish uchun – 7 ish kunidan;
• ro‘yxatdan o‘tkazish guvohnomasini qayta rasmiylashtirish uchun – 5 ish kunidan;
• o‘z xohishi bilan vaqtincha faoliyatni to‘xtatib turish uchun – 8 ish soatidan;
• o‘z xohishi bilan faoliyatni tiklash uchun – 8 ish soatidan;
• o‘z xohishi bilan faoliyatni to‘xtatish uchun – 8 ish soatidan oshmaydigan muddatda ko‘rib chiqadi.
 
Elektron idoralararo hamkorlik tizimi sxemasiga muvofiq Asillik palatasi ro‘yxatdan o‘tkazish guvohnomasini berish uchun zarur bo‘lgan boshqa vakolatli idoralardagi mavjud ma'lumotlarni belgilangan tartibda mustaqil ravishda oladi.
 
Qarorni qabul qilish muddati tugashidan kamida 3 ish soatidan kechiktirmay, Asillik palatasi Davlat xizmatlari ko‘rsatish markaziga yoxud ariza beruvchining Yagona portaldagi shaxsiy kabinetiga rasmiylashtirilgan ro‘yxatdan o‘tkazish guvohnomasini yoki ro‘yxatdan o‘tkazish guvohnomasini berishni rad etish to‘g‘risidagi bildirishnomani yuboradi. Davlat xizmatlari ko‘rsatish markaziga arizani o‘rganib chiqish natijasi bo‘yicha tushgan, Davlat xizmatlari ko‘rsatish markazi tomonidan qog‘ozga chop etilgan va uning muhri bosilgan hujjat Asillik palatasi tomonidan berilgan ro‘yxatdan o‘tkazish guvohnomasiga tenglashtiriladi.
 
Agar Asillik palatasi ariza beruvchiga rasmiylashtirilgan ro‘yxatdan o‘tkazish guvohnomasini yubormasa yoki uni berishni rad etish to‘g‘risida xabardor qilmasa, muddat o‘tgach ariza beruvchi bu to‘g‘rida Davlat xizmatlari ko‘rsatish markazi yoxud Yagona portal orqali tegishli bildirishnomani yuborib, qimmatbaho metallar va qimmatbaho toshlar bilan ishlarni bajarish huquqiga ega bo‘ladi.
 
Bu holda Asillik palatasi ariza beruvchining bildirishnomasi olingan kundan boshlab 3 ish kuni mobaynida unga rasmiylashtirilgan ro‘yxatdan o‘tkazish guvohnomasini yuborishi shart.
 
Ro‘yxatdan o‘tkazish guvohnomasi olingunga qadar Davlat xizmatlari ko‘rsatish markazining noyob ro‘yxatdan o‘tkazish raqamiga egalik to‘g‘risidagi bildirishnomasi yoki noyob ro‘yxatdan o‘tkazish raqami qabul qilinganligi va u to‘g‘risidagi belgi qo‘yilgan bildirishnoma olinganligi to‘g‘risidagi tilxat ro‘yxatdan o‘tkazish guvohnomasiga tenglashtiriladi hamda qimmatbaho metallar va qimmatbaho toshlar bilan ishlarni amalga oshirish uchun asos hisoblanadi.
 
Savdo qilishga ro‘yxatdan o‘tkazish guvohnomasini berish to‘g‘risidagi arizani ko‘rib chiqish yakunlari bo‘yicha Asillik palatasi rasmiylashtirilgan ro‘yxatdan o‘tkazish guvohnomasi bilan birga ariza beruvchiga Qoraqalpog‘iston Respublikasi Vazirlar Kengashi, viloyatlar va Toshkent shahri hokimliklari tomonidan tasdiqlangan savdo obektining dislokatsiyasini yuboradi.
 
Ular tomonidan tasdiqlangan joylashish tartibi (asoslari ko‘rsatilgan rad etish mavjud bo‘lmaganda) taqdim etilmasligi yoki o‘z vaqtida taqdim etilmasligi ariza beruvchiga zargarlik buyumlari va qimmatbaho metallardan yasalgan boshqa buyumlar bilan savdo qilish uchun ro‘yxatdan o‘tkazish guvohnomasi berilishi rad etilishi uchun asos hisoblanmaydi.
 
Ro‘yxatdan o‘tkazish guvohnomasi berishni rad etish haqida qaror qabul qilingan taqdirda Asillik palatasi Davlat xizmatlari ko‘rsatish markaziga yoxud ariza beruvchining Yagona portaldagi shaxsiy kabinetiga rad etish haqida rad etish sabablarini, qonun hujjatlarining aniq normalarini ko‘rsatib va ariza beruvchi ko‘rsatilgan sabablarni bartaraf etib qayta ko‘rib chiqish uchun hujjatlarni taqdim etishi mumkin bo‘lgan muddatni ko‘rsatgan holda tegishli bildirishnoma jo‘natadi. Ariza beruvchi rad etish sabablarini bartaraf etish va hujjatlarni qayta ko‘rib chiqish uchun taqdim etish huquqiga ega bo‘lgan muddat 30 kalendar kun doirasida belgilangan. Ariza takroran ko‘rib chiqilganligi uchun yig‘im undirilmaydi.
 
Ro‘yxatdan o‘tkazish guvohnomasini qayta rasmiylashtirish yoki uning amal qilish muddatini uzaytirish hollarida ham xuddi shunday tartib-taomil qo‘llaniladi. Ikkala holatda eng kam ish haqining 50%i miqdorida yig‘im nazarda tutilgan. Asillik palatasi tomonidan ro‘yxatdan o‘tkazish guvohnomasini qayta rasmiylashtirish yoki uning amal qilish muddatini uzaytirishni rad etish haqida qaror qabul qilingan taqdirda to‘langan yig‘im summasi qaytariladi.

Ro‘yxatdan o‘tkazish guvohnomasining amal qilishi unda ko‘rsatilgan muddat tugagan sanadan to‘xtatiladi. Ro‘yxatdan o‘tkazish guvohnomasining amal qilishini to‘xtatib turish va to‘xtatish «Tadbirkorlik faoliyati sohasidagi ruxsat berish tartib-taomillari to‘g‘risida»gi Qonunning 22 va 23-moddalarida nazarda tutilgan hollarda va tartibda amalga oshiriladi.
 
Asillik palatasi tomonidan ro‘yxatdan o‘tkazish guvohnomasining amal qilishini to‘xtatish yoki to‘xtatib qo‘yish to‘g‘risida qaror qabul qilinganda tegishli bildirishnoma ariza beruvchining elektron pochta manziliga, uning joylashgan pochta manziliga yoki Yagona portaldagi shaxsiy kabinetiga to‘xtatib turilishi yoki to‘xtatilishining asoslangan sabablari, qonun hujjatlarining aniq normalari va ariza beruvchi ko‘rsatilgan sabablarni bartaraf qilib hujjatlarni qayta ko‘rib chiqish uchun taqdim etishi mumkin bo‘lgan muddatlar ko‘rsatilgan holda yuboriladi.    
 
Yuridik shaxsning muassislari (qatnashchilari) tomonidan ixtiyoriy ravishda tugatish yoki faoliyatning ushbu turini amalga oshirishni to‘xtatish to‘g‘risida qaror qabul qilingan taqdirda ariza beruvchi tomonidan Davlat xizmatlari ko‘rsatish markaziga yoxud Yagona portal orqali ariza beriladi.
 
Ariza va bildirishnomalarning barcha shakllari ishlab chiqilgan hamda Nizomga ilova qilingan.
 
Hujjat 1.06.2018 yildan kuchga kirdi.