Hukumat rangli va qora metallarga doir yangi qaror qabul qildi

O‘zbekiston Respublikasi Vazirlar Mahkamasining “Rangli va qora metallar parchalari, chiqindilari bilan ishlash tartibini takomillashtirish chora-tadbirlari to‘g‘risida”gi qarori qabul qilindi.

Hujjat bilan belgilanishicha, O‘zbekiston Respublikasi hududida:

O‘zbekiston Respublikasi prezidentining «O‘zmetkombinat» AJ boshqaruvi tizimini yanada takomillashtirish chora-tadbirlar to‘g‘risida” 2017 yil 15 sentabrdagi PQ-3277-son qaroriga muvofiq - «O‘zmetkombinat» AJ O‘zbekiston Respublikasi hududida qora metall parchalari va chiqindilarini tayyorlash (xarid qilish) bo‘yicha yagona vakolatli organ hisoblanadi;

O‘zbekiston Respublikasi Vazirlar Mahkamasining «Rangli metall parchalari va chiqindilarini to‘plash, topshirish hamda qayta ishlash tizimini takomillashtirish chora-tadbirlari to‘g‘risida» 2017 yil 18 oktabrdagi 849-son qaroriga muvofiq - rangli metall parchalari va chiqindilarini tayyorlashni faqat «O‘zikkilamchiranglimetall» AJ amalga oshiradi;

O‘zbekiston Respublikasi prezidentining «Rangli metallar parchalari va chiqindilari o‘g‘irlanishi hamda noqonuniy chetga olib chiqib ketilishining oldini olish chora-tadbirlari to‘g‘risida» 2000 yil 4 martdagi PF-2559-son Farmoniga muvofiq, O‘zbekiston Respublikasi prezidentining «O‘zbekiston Respublikasi prezidentining ayrim qarorlariga o‘zgartishlar kiritish, shuningdek ba'zilarini o‘z kuchini yo‘qotgan deb hisoblash to‘g‘risida» 2018 yil 12 yanvardagi PF-5300-son farmoni bilan kiritilgan o‘zgarishlarni  hisobga olgan holda, «O‘zikkilamchiranglimetall» AJ va uning tarkibiy tuzilmalari jismoniy shaxslardan rangli metallarning maishiy parchalarini, shu jumladan, foydalanish uchun mo‘ljallangan asboblar va uskunalarni, shuningdek, hukumat qarori bilan tasdiqlangan ro‘yxat bo‘yicha rangli metallar parchalari va chiqindilarini maxsus qabul punktlari orqali qabul qiladi.

Quyidagilar:

Rangli va qora metall parchalari, chiqindilari bilan ishlash tartibi to‘g‘risidagi nizom;

Jismoniy shaxslardan qabul qilishga ruxsat etilgan maishiy maqsaddagi rangli metall parchalari va chiqindilarining ro‘yxati tasdiqlandi.

«O‘zikkilamchiranglimetall» AJ ikki oy muddatda Qoraqalpog‘iston Respublikasi va respublika viloyatlari shaharlari va tuman markazlarida rangli metallar parchalari va chiqindilarini jismoniy shaxslardan qabul qilish punktlarini tashkil qiladi.

Belgilanishicha, 2019 yil 1 yanvardan boshlab tashkilotlarning, shaxsiy quyish va metall prokati ishlab chiqarishiga ega bo‘lgan tashkilotlardan tashqari (bankrotlik va tugatish hollaridan tashqari), tashkilotlarning o‘z quyish va metall prokati ishlab chiqarishiga ega bo‘lgan tashkilotlar bundan mustasno (bankrotlik va tugatish hollaridan tashqari), bankrotligi, tugatilishi, rekonstruksiya va modernizatsiya qilinishi tartibotlarini o‘tkazish davomida belgilangan tartibda hisobdan chiqariladigan tarkibida rangli va qora metallar bo‘lgan tabiiy va ma'naviy eskirgan asbob-uskunalar «O‘zmetkombinat» AJ va «O‘zikkilamchiranglimetall» AJga erkin (shartnomaviy) narxda topshirilishi kerak.

Rangli va qora metallar parchalari, chiqindilari bilan ishlash tartibi to‘g‘risidagi nizomga ko‘ra, metall parchalari mulkdorlari - yuridik va jismoniy shaxslar qonun hujjatlarida belgilangan vakolatlar doirasida ularga egalik qiladilar, foydalanadilar va tasarruf etadilar.

Kelgusi yil uchun respublika ichida metall parchalarini tayyorlash ko‘rsatkichlari O‘zbekiston Respublikasi Iqtisodiyot vazirligi tomonidan «O‘zmetkombinat» AJ va «O‘zikkilamchiranglimetall» AJ bilan hamkorlikda, davlat va xo‘jalik boshqaruvi organlari, mahalliy ijro etuvchi hokimiyat organlarining takliflarini inobatga olgan holda ishlab chiqiladi.

Kelgusi yil uchun takliflar har yili 1 oktabrgacha bo‘lgan muddatda berilishi ta'minlanadi.

Qora metallarning parchalari, chiqindilarini tayyorlash balansi har yili belgilangan tartibda O‘zbekiston Respublikasi Prezidentining qarori bilan tasdiqlanadi. 

Rangli metallarning parchalari va chiqindilarining hosil bo‘lishi balansi har yili belgilangan tartibda O‘zbekiston Respublikasi Iqtisodiyot vazirligi hay'ati tomonidan tasdiqlanadi.

Parchalarni topshiruvchilar kuyidagilarni ta'minlaydilar:

metall parchalarini yig‘ish, saqlash va tayyorlovchiga yetkazib berish;
metall parchalarini tashish, qayta ishlash va qayta quyish uchun xavfsiz bo‘lgan holatda yetkazib berish.

Yetkazib beriladigan metall parchalari yonuvchan-portlovchan, kimyoviy va radioaktiv materiallardan zararsizlantirilgan bo‘lishi lozim.

Tayyorlovchiga portlovchan, kimyoviy ifloslangan va radioaktiv metall parchalarini yetkazib berish taqiqlanadi.

Tayyorlovchi metall parchalari muntazam asosda hosil bo‘ladigan parchalarni topshiruvchilarga bepul asosda, metall parchalarini yig‘ish va tayyorlovchiga yetkazib bergunga qadar saqlash uchun konteynerlar, urnalar, qutilar va boshqa vositalarni vaqtincha foydalanishga berishga haqli.

Metall parchalarining miqdori (og‘irligi) va tavsifi tayyorlovchi tomonidan metall parchalarini qabul qilish holati bo‘yicha tuziladigan qabul qilish-topshirish dalolatnomalarida qayd qilinadi.

Yuridik shaxslardan metall parchalarini qabul qilish tuzilgan shartnomalarga asosan tayyorlovchining maxsus qabul qilish shoxobchalarida, har bir turkum bo‘yicha brutto og‘irligi va transport vositasi, idishi va ifloslanganligi o‘rtasidagi farq sifatida aniqlanadigan netto og‘irligi bo‘yicha amalga oshiriladi.

Tayyorlovchi va parchalarni topshiruvchi o‘rtasida tuziladigan shartnomalarda metall parchalarini yetkazib berish hajmlari, turlari, muddatlari, to‘lov shartlari, taraflarning huquq va majburiyatlari, shuningdek, shartnomada nazarda tutilgan majburiyatlarni bajarmaganlik uchun javobgarligi ko‘rsatiladi.

Tayyorlovchi yuridik shaxslar bilan, ularga metall parchalarini yig‘ish, saqlash va faqat tayyorlovchiga yetkazib berish huquqini bergan holda, metall parchalarini yetkazib berishga shartnomalar tuzish yo‘li bilan metall parchalarini tayyorlashga haqli.

Tayyorlovchining aholidan metall parchalari qabul qilinadigan maxsus shoxobchalarida hammaga ko‘rinadigan joyda quyidagi axborot ko‘rsatilgan e'lon osilgan bo‘lishi lozim:

metall parchalarini qabul qilish shartlari va narxlari;
jismoniy shaxslardan qabul qilinishi ruxsat etilgan metall parchalari turlari ro‘yxati.

Metall parchalari ularning har bir turkumiga tayyorlovchi tomonidan belgilangan shaklda qabul qilish-topshirish dalolatnomasi majburiy tartibda tuzilgan holda qabul qilinadi.

Jismoniy shaxslar bilan o‘zaro hisob-kitoblar qabul qilish-topshirish dalolatnomasi asosida amalga oshiriladi.

Qabul qilingan metall parchalari uchun to‘lov pul mablag‘lari bilan bozor asosida aniqlanadigan erkin (shartnomaviy) narxlar bo‘yicha, yuridik shaxslar uchun - naqdsiz shaklda, jismoniy shaxslar uchun - naqd shaklda, shuningdek O‘zbekiston Respublikasining qonun hujjatlariga muvofiq to‘lovning boshqa usullarida amalga oshiriladi.