Turkiyaning Eskisheher viloyatida Transanatoliya gaz quvuri – TANAP’ning tantanali ochilishi bo‘lib o‘tdi. Bu gaz quvuri orqali Ozarboyjon gazi Rossiyani chetlab o‘tgan holda Yevropaga yetkaziladi.
Kompressor-o‘lchash stansiyasida o‘tgan marosimda Turkiya prezidenti Rajab Toyyib Erdo‘g‘an, Ozarboyjon prezidenti Ilhom Aliyev, Serbiya prezidenti Aleksandr Vuchich va Ukraina prezidenti Pyotr Poroshenko ishtirok etdi.
Erdo‘g‘an o‘z nutqida ushbu loyihani “Energetik Ipak yo‘li” deb atagan.
Gaz quvurining o‘tkazish quvvati yiliga 16 mlrd kubmetr gazni tashkil qiladi, bu hajmdan 6 mlrd kubmetrini Turkiya oladi, qolgan 10 mlrd kubmetri Yevropa janubidagi davlatlarga yetkaziladi.
Uzunligi 1850 km bo‘lgan gaz quvuri orqali Ozarboyjonning Shox-Deniz konidan olinadigan gaz Turkiyaning g‘arbiy chegaralarigacha yetkaziladi.
