Samarqandda 6 ming dollarni o‘marib ketgan shaxs ushlandi

13 iyun kuni Samarqand shahrida noma'lum shaxs “Marmar” dehqon bozori oldida Past Darg‘om tumanida yashovchi Z.N. ismli ayolga xorijiy valyutadagi pullarini Samarqand shahar temiryo‘l vokzali oldida joylashgan bankda so‘mga almashtirib berishini aytib, birgalikda yo‘lovchi taksi avtomashinasiga o‘tiradi. 

O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi xabariga ko‘ra, Gagarin ko‘chasiga yetib kelganlarida noma'lum shaxs Z.N.ning qo‘lidan ichida 6 000 AQSh dollari, 200 ming so‘m puli, zargarlik buyumi va fuqarolik pasporti bo‘lgan sumkasini tortib olib, avtomashinadan tushib voqea joyidan qochib ketgan.

Ko‘rilgan choralar natijasida ushbu jinoyatni Sattepo maskanida yashovchi F.B. sodir etganligi aniqlanib, ushlangan.