Saudiya Arabistoni so‘nggi paytda qator sohalarda inqilobiy o‘zgarishlarni amalga oshirib kelyapti. Jumladan, ayollarning avtomobil boshqarishi va haydovchilik guvohnomasi olishlariga ruxsat berildi. Yaqin orada samolyotlarda ayol uchuvchilarni ko‘rish mumkin bo‘ladi.
Reuters hisobotida aytilishicha, sohada yetakchi rekruiter Oxford Aviation Academy sentabr oyida boshlanadigan darslarga qatnashish uchun yuzlab ayollardan arizalarni qabul qildi. Mashg‘ulotlar Dammamning sharqiy shahrida joylashgan yangi filialda bo‘lib o‘tadi.
«Odamlar aviatsiyani o‘rganish maqsadida xorijga chiqib ketishyapti. Uchuvchilik ayollar uchun nisbatan qiyinchilik tug‘dirishi barchaga ma'lum. Ayollar cheklangan sharoitda yashaydigan zamonlar o‘tib ketdi. Barcha imkoniyatlar biz uchun. Istak bo‘lsa bo‘lgani», deya fikr bildirdi Dalal Yashar.
Aviatsiya maktabi hamda aeroportlarda parvoz simulyatorlari uchun xalqaro markaz faoliyati yo‘lga qo‘yiladi. Ijrochi direktor Usmon al-Mo‘tairiy talabalarni o‘qitish nazariy va amaliy bosqichlardan iborat bo‘lishini aytib o‘tdi.
Yarim orolda ayollarning avtomobil haydashiga ancha yillar davomida taqiq qo‘yib kelingandi. Bu mamlakatda ayollar repressiyasi sifatida baholangan. O‘tgan oyda esa bu holatga chek qo‘yildi. Yosh shahzoda Muhammad ibn Salmon mamlakat iqtisodiyotini jadallashtirish va fuqarolik jamiyatini shakllantirish maqsadida chuqur islohotlar olib bormoqda. O‘zgarishlar oqimi g‘arblik ittifoqchilar tomonidan iliq kutib olindi. Ammo haligacha mamlakatda bunga qarshilik qilayotganlar talaygina.
