Marsga parvoz yanada uzoq muddatga qoldirilishi mumkin

Florida shtatidan senator etib saylangan astronavt Bill Nelson NASAning hozirgi byudjyeti va Donald Trampning Oyga parvoz haqidagi rejalari sababli Marsga odamlarning parvozi 2050 yilga qoldirilishi mumkinligidan tashvishdaligini bildirdi. Bu haqda Phys.org yozmoqda.

AQSh Qizil sayyoraga 2030 yilga kelib astronavtlarni jo‘natishni rejalashtirgandi, ammo NASAda bu borada hali ham batafsil reja mavjud emas, reja ishlab chiqish yetti oyga ortga surildi. Bu qisman Trampning yana Oy bo‘yicha dasturni yo‘lga qo‘yish rejasi bilan bog‘liq. AQShning avvalgi prezidenti Barak Obama Marsga parvozga e'tibor qaratish zarurligini aytib Oyga parvozlar rejalashtirilgan «Yulduzlar turkumi» dasturini bekor qilgandi.
 
Yana bir muammo esa moliyaviy yetishmovchilikdir. 2009 yilda kosmik parvozlar sohasidagi muammolarni ko‘rib chiqish bilan shug‘ullanuvchi Ogustin komissiyasi insonning Oy yoki Marsga parvozini tashkil etish uchun NASA byudjyeti uch milliard dollarga oshirilishi zarurligini bildirgandi. Milliy fanlar akademiyasi esa Marsga parvoz 2050 yildan oldin amalga oshmasligini hisoblab chiqqandi.

2017 yilda Kongress NASAdan Mars missiyasi bo‘yicha bosqichma-bosqich rejani taqdim etishni talab qilgandi. Explore Mars kompaniyasi ijrochi direktori Kris Karberrining aytishicha, AQShning xalqaro va tijorat hamkorlari Qizil sayyoraga parvozni amalga oshirishda yordam berishlari mumkin, ammo ular hukumat o‘z fikrini muntazam o‘zgartirib turishidan xavotirda.