Bosh prokuraturada soliqchilar va bojxonachilarni nazorat qiluvchi yangi boshqarma tashkil etiladi

O‘zbekiston Respublikasi prezidenti “O‘zbekiston Respublikasida amalga oshirilayotgan soliq va bojxona islohotlariga huquqiy hamrohlik qilish bo‘yicha chora-tadbirlar to‘g‘risida”gi farmonni imzoladi.

Hujjat bilan Bosh prokuraturaning Bojxona va soliq sohalaridagi qonunchilik ijrosini nazorat qilish bo‘yicha boshqarmasi Bosh prokuraturaning Soliq va bojxona islohotlarini amalga oshirish sohasidagi qonunchilik ijrosi ustidan nazorat boshqarmasi etib qayta tashkil etiladi.

Uning faoliyati asosiy yo‘nalishlari etib quyidagilar belgilandi:

aholi uchun soliq majburiyatlarini ko‘ngilli bajarishda huquqiy savodxonlikni oshirish orqali ijobiy sharoitlar yaratish;

soliq organlari malakasi darajasining oshirilishi ustidan nazorat o‘rnatish;

soliq organlari tomonidan soliq nazoratining yangi usullarini qo‘llashda soliq to‘lovchilar huquq va manfaatlarini ta'minlash;

soliq va bojxona ma'muriyatchiligini amalga oshirish jarayoniga zamonaviy axborot-kommunikatsiya texnologiyalarini keng tatbiq etishda ishtirok etish;

davlat organlari va boshqa tashkilotlar tomonidan soliq va bojxona islohotlari o‘z vaqtida hamda sifatli amalga oshirilishi ustidan nazorat qilish;

soliq va bojxona organlarining qonunchilik talablariga qat'iy rioya etishini ta'minlash;

soliq solish tizimini takomillashtirishda ishtirok etish;

soliq to‘lovchilar va soliq solinadigan obektlar to‘liq qamrab olinishi, shuningdek, yig‘iladigan soliq va bojxona to‘lovlari ustidan nazoratni amalga oshirish;

soliq, bojxona, moliya organlari, joylardagi ijro etuvchi hokimiyat organlari va fuqarolarning o‘zini-o‘zi boshqarish organlari hamda boshqa tashkilotlar bilan soliq solinuvchi bazani kengaytirish bo‘yicha qalin hamkorlikni tashkil etish;

soliq to‘lovchilar axborot bazasini to‘laqonli yuritishni ta'minlash maqsadida soliq to‘lovchilarni pasportlashtirishni amalga oshirish bo‘yicha ishlarni muvofiqlashtirish;

soliq organlariga soliq solinuvchi bazani yashirish yuqori xatariga ega va soliqlar to‘lashdan bo‘yin tovlaydigan shaxslarni aniqlashda ko‘mak ko‘rsatish.