Surxondaryoda kanallarni qurish va qayta tiklashga to‘sqinlik qilayotgan 16716 dona daraxt kesilishi mumkin

Normativ-huquqiy hujjatlar loyihalari muhokamasi portalida Vazirlar Mahkamasining “Islom taraqqiyot banki ishtirokida “Surxondaryo viloyati suv resurslarini boshqarishni yaxshilash (Hazarbog‘-Oqqopchig‘ay kanallari tizimini qayta tiklash)” investitsiya loyihasini amalga oshirishga oid qo‘shimcha chora-tadbirlar to‘g‘risida”gi qarori loyihasi e'lon qilindi.

Hujjat bilan Islom taraqqiyot banki ishtirokida “Surxondaryo viloyati suv resurslari boshqarilishini yaxshilash (Hazarbog‘-Oqqopchig‘ay kanallari tizimini qayta qurish)” loyihasi doirasida irrigatsiya kanallarini qurish va qayta tiklashga to‘sqinlik qilayotgan 16716 dona Davlat o‘rmon fondiga kirmaydigan daraxtlarni istisno tariqasida haq to‘lamasdan kesish to‘g‘risidagi O‘zbekiston Respublikasi Ekologiya, atrof muhitni muhofaza qilish davlat qo‘mitasining hamda Surxondaryo viloyati xokimligining takliflari ma'qullanishi mumkin.

Surxondaryo viloyati hokimligi:
   
belgilangan tartibda investitsiya loyihasi doirasida irrigatsiya kanallarini qurish va qayta tiklashga to‘sqinlik qilayotgan Davlat o‘rmon fondiga kirmaydigan daraxtlarni istisno tariqasida kesganlik uchun to‘lov to‘lamasdan kesish bo‘yicha tegishli qarorini qabul qilinishini ta'minlaydi;

Davlat o‘rmon fondiga kirmaydigan daraxtlar kesilishi natijasida olinadigan yog‘och mahsulotlarini tayyorlov va savdo tashkilotlari orqali belgilangan tartibda realizatsiyasini ta'minlash yuzasidan tegishli chora tadbirlarni amalga oshiradi;
      
Davlat o‘rmon fondiga kirmaydigan daraxtlarni kesish vaqtida belgilangan talablarga rioya etilishi yuzasidan nazorat o‘rnatadi;
    
yog‘och mahsulotlarining realizatsiyasidan tushgan mablag‘larning 50 foizini mahalliy byudjyetga viloyatda atrof-muhitni muhofaza qilish tadbirlari bilan bog‘liq xarajatlar uchun, qolgan 50 foizini Ekologiya, atrof muhitni muhofaza qilish va chiqindilar bilan bog‘liq ishlarni amalga oshirish jamg‘armasiga o‘tkazilishini ta'minlaydi.