Hodisa 2026-yil 1-oktabr kuni soat 23:59 da Chilonzor tumanidagi Kichik halqa yoʻli koʻchasida sodir boʻlgan. Keltirilgan maʼlumotga koʻra, daraxt yoʻlda harakatlanayotgan avtomashina ustiga sinib qulagan.
Voqeadan soʻng hududga zudlik bilan qutqaruv ekipajlari hamda hamkor xizmatlar jalb etilgan. Ular hodisa oqibatlarini bartaraf etish va yoʻlni harakat uchun ochish choralarini koʻrgan.
Olib borilgan tezkor ishlar natijasida yoʻldagi toʻsiqlar bartaraf qilinib, mazkur hududda avtomobillar harakati qayta tiklangan.
Xabarda alohida qayd etilishicha, hodisa oqibatida hech kim tan jarohati olmagan. Avtomobilda nechta kishi boʻlgani, transport vositasining rusumi va unga yetkazilgan zarar miqdori haqida maʼlumot berilmagan.
Daraxtning nima sababdan sinib qulaganiga ham hozircha aniqlik kiritilmagan.
