O‘zbekistonlik professional bokschilardan yana biri - Jamshidbek Najmiddinov AQShga yo‘l olmoqda. Kun.uz`ga ma'lum bo‘lishicha, Najmiddinov okeanorti mamlakatining nufuzli promousheni Ronson Frank boshchilik qilayotgan “Uprising promotion” bilan shartnoma tuzishga erishgan.
Jamshidbekning menejyeri Muhammadmirzo Najmiddinov bergan ma'lumotga ko‘ra, shartnoma uch yilga mo‘ljallangan. Bitimga muvofiq, har yili to‘rttadan jang o‘tkazish belgilangan. Janglardan har uchinchisi professional boks olamidagi eng nufuzli ikki telekanalning biri – HBO BOXING o‘tkazadigan shoudan o‘rin oladi.
Ta'kidlash joiz, ushbu telekanal shoularida ringga ko‘tarilish professional boks olamida yuqori baholanadigan voqeliklardan biridir.
Jamshidbek Najmiddinov hozirga qadar 18 ta jang o‘tkazib, 17 marta g‘alaba qozongan. Shulardan 12 tasida raqiblarini nokautga uchratgan. Faoliyatidagi yagona mag‘lubiyat 2017 yil 16 sentabr kuni Ukraina poytaxti Kiyev shahrida WBC yo‘nalishining sobiq chempioni Viktor Postolga qarshi kechgan jangda qayd etilgandi.
