18:09 / 17.08.2018
3559
6 ой давомида нечта ёнғин содир бўлгани айтилди

Давлат ёнғин хавфсизлиги хизмати, Фуқароларнинг ўзини ўзи бошқариш органлари фаолиятини мувофиқлаштириш бўйича Республика Кенгаши бошқаруви ҳамда  “Ўзтрансгаз” акциядорлик жамияти ҳамкорлигида аҳоли тураржойларида, маиший хизмат кўрсатиш иншоотларида ёнғин хавфсизлигини таъминлаш, бу борада фуқароларнинг ҳушёрлигини оширишга қаратилган маърифий тарғибот ишлари кучайтиришга алоҳида аҳамият қаратиляпти.  

Фото: Давлат ёнғин хавфсизлиги хизмати

“Ўзтрансгаз” АЖ ахборот хизмати хабарига кўра, Ўзбекистон Республикаси ИИВ Ёнғин хавфсизлиги институтида “Тилсиз ёвга” қарши биргаликда курашамиз” мавзуида ўтказилаётган  республика илмий-амалий семинарида ҳам айни шу масалалар кенг муҳокама қилинмоқда. Шунингдек, Давлат ёнғин хавфсизлиги хизмати тизимидаги ислоҳотларнинг мазмун-моҳияти бўйича атрофлича тушунтириш ишлари олиб борилмоқда. 

Фото: Давлат ёнғин хавфсизлиги хизмати
Фото: Давлат ёнғин хавфсизлиги хизмати

Йиғилишда таъкидланишича, жорий йилнинг ўтган олти ойида юртимизда 5 минг 772та ёнғин содир бўлган. Тан жароҳати олганлар эса икки юз нафар кишидан иборат. Энг ачинарлиси, 74 нафар фуқаро оламдан ўтган. Бугунги кунда ёнғинларнинг 70 фоизи аҳоли яшаш жойларида, хонадонларда содир бўлмоқда. Амалиётлар шуни кўрсатадики, асосий ҳалокатлар ва тан жароҳатлари носоз ва қўлбола газ қурилмалари, яроқсиз электр мосламалари туфайли ва иситиш ускуналаридан хавфсизлик қоидаларига риоя этмасдан фойдаланиш, спиртли ичимликлар истеъмол қилиб ҳушёрликни йўқотиш оқибатида юзага келган. 

Фото: Давлат ёнғин хавфсизлиги хизмати

Ҳамкор ташкилотлар томонидан ҳамжиҳатликда ёнғиннинг олдини олиш, аҳоли хавфсизлигини таъминлаш, газ, электр энергияси, иситиш ускуналаридан фойдаланишда қатъий қоидаларга риоя қилиш бўйича таклифлар кўриб чиқилмоқда.   
 

Top