Normativ-huquqiy hujjatlar loyihalari muhokamasi portalida prezidentning “Respublikada seleksiya-naslchilik ishlarini olib borish tizimini tubdan takomillashtirishga doir qo‘shimcha chora-tadbirlari to‘g‘risida”gi qarori loyihasi joylashtirildi.

Hujjat bilan O‘zbekiston Respublikasi Qishloq xo‘jaligi vazirligi, Iqtisodiyot vazirligi, Moliya vazirligi, O‘zbekiston fermer, dehqon xo‘jaliklari va tomorqa yer egalari kengashi va Chorvachilikda “Nasl xizmat” respublika naslchilik uyushmasi ta'sischilarining mazkur uyushma negizida Qishloq xo‘jaligi vazirligi huzuridagi “O‘zbeknaslxizmat” uyushmasini tashkil etish to‘g‘risidagi taklifiga rozilik berilishi mumkin.

Quyidagilar Uyushmaning asosiy vazifalari va faoliyat yo‘nalishlari etib belgilanadi:

chorvachilikning barcha tarmoqlarida, jumladan, qoramolchilik, qo‘ychilik, echkichilik, yilqichilik, quyonchilikda seleksiya-naslchilik hamda sun'iy urug‘lantirish ishlarini rivojlantirishga qaratilgan normativ-huquqiy bazani,  o‘rta va uzoq muddatga mo‘ljallangan konsepsiyasi va davlat tarmoq dasturlarini ishlab chiqish va takomillashtirishda ishtirok etish hamda uni amalga oshirilishi ustidan monitoring olib borish;

chetdan naslli mollar va mahsulot (material)larni olib kelish ishlarini muvofiqlashtirish, seleksiya-naslchilik sohasida va sun'iy urug‘lantirish bo‘yicha ilg‘or xorijiy tajribalar, ilmiy, innovatsion ishlanmalarni joriy qilishga investitsiyalarni jalb qilish;

halqaro moliya va donor tashkilotlari bilan hamkorlik o‘rnatish, sut va go‘sht ishlab chiqarishning zamonaviy texnologiyalarini joriy etish, chorva mollarini bo‘rdoqiga boqish ishlarini keng joriy etish hisobiga mahsulot ishlab chiqarish hajmlarini oshirish, texnologik, investitsion va kelgusida eksport siyosatini izchil amalga oshirish;

ozuqa ekin maydonlari uchun ajratilgan yer maydonlaridan maqsadli va samarali foydalanish yuzasidan tavsiyalar ishlab chiqish hamda ozuqa tarkibini to‘liq tahlil qiladigan zamonaviy laboratoriyalarni tashkil etish.

Belgilab qo‘yilishicha: 

Uyushma raisi va uning o‘rinbosarlari muassislarning umumiy yig‘ilishi qarori bilan saylanadilar va Vazirlar Mahkamasi bilan kelishilgan holda O‘zbekiston Respublikasi Qishloq xo‘jaligi vazirining qarori bilan lavozimga tasdiqlanadilar;