Don korxonalari o‘rtasida don sotish va olish bo‘yicha shartnomalar tuzishga ruxsat beriladi

Normativ-huquqiy hujjatlar loyihalari muhokamasi portalida prezidentning “2019 yil hosili uchun kuzgi boshoqli don ekinlari navlarini joylashtirish va boshoqli don ishlab chiqarishning prognoz hajmlari to‘g‘risida”gi qarori loyihasi joylashtirildi.

Hujjat bilan O‘zbekiston Respublikasi Qishloq xo‘jaligi vazirligi, Innovatsion rivojlantirish vazirligi, O‘zbekiston fermer, dehqon xo‘jaliklari va tomorqa yer egalari Kengashi, Qoraqalpog‘iston Respublikasi Vazirlar Mahkamasi va viloyat hokimliklarining boshoqli don yetishtiruvchi fermer xo‘jaliklari bilan “O‘zdonmahsulot” aksiyadorlik kompaniyasi tarkibiga kiruvchi don korxonalari o‘rtasida don sotish va olish bo‘yicha kontraktatsiya shartnomalarini tuzish takliflariga rozilik berilishi rejalashtirilgan.

Qoraqalpog‘iston Respublikasi Vazirlar Kengashi va viloyatlar hokimliklari, “O‘zdonmahsulot” aksiyadorlik kompaniyasiga:

2019 yil hosili uchun ekiladigan kuzgi boshoqli don ekinlari urug‘larini yetarli miqdorda nav va avlodlar bo‘yicha tozalash, saralash, dorilash, qoplash va sertifikatlashtirish;

sug‘oriladigan maydonlarda asosan birinchi va ikkinchi reproduksiyali va lalmi maydonlarda uchinchi reproduksiyadan past bo‘lmagan urug‘lik donni ekish uchun ishlatish;

boshoqli don ekinlarini yetishtiruvchilar tomonidan g‘alla navlarini joylashtirish bo‘yicha tasdiqlangan qarorning so‘zsiz bajarilishini ta'minlash topshiriladi.

Bunda Respublika hududida ekish uchun tavsiya etilmagan g‘alla navlarini ekmaslik hamda tozalanmagan, saralanmagan, dorilanmagan urug‘lik donni va urug‘lik uchun tovar doni ishlatishga yo‘l qo‘yilmaydi.

“O‘zkimyosanoat” aksiyadorlik jamiyati, “O‘zagrokimyohimoya” aksiyadorlik jamiyati, “O‘zneftmahsulot” aksiyadorlik jamiyati, Qoraqalpog‘iston Respublikasi Vazirlar Mahkamasi va viloyatlar hokimliklari bilan birgalikda:

2019 yil hosili uchun kuzgi boshoqli don ekinlari ekiladigan maydonlarga beriladigan 40 ming tonna fosforli va 10 ming tonna kaliyli (sof holda) mineral o‘g‘itlarni joriy yilning 20 sentabrigacha joylarga yetkazib berilishini;

2019 yil hosili uchun kuzgi boshoqli don ekinlarini ekish uchun talab etiladigan yoqilg‘i moylash mahsulotlarini yetkazib berilishini ta'minlaydi.

“O‘zagrotexsanoatxolding” aksiyadorlik jamiyati, “O‘zagroservis” aksiyadorlik jamiyati Qoraqalpog‘iston Respublikasi Vazirlar Mahkamasi va viloyatlar hokimliklari bilan birgalikda:

boshoqli don ekinlarini ekish va yer tayyorlash uchun zarur bo‘lgan texnikalarni (yer haydash omoch, chizel, barana, ochiq va g‘o‘za qator orasiga don ekish seyalkalari) qayta inventarizatsiyadan o‘tkazib, to‘liq ta'mirdan chiqarilishi, 2018 yil 30 avgustga qadar tayyor holatga keltirilishi;

ochiq va g‘o‘za qator orasiga don ekishda yetishmaydigan seyalkalarni 2018 yil 5 sentabrga qadar sotib olinishi;

2018 yil 20 avgustga qadar boshoqli don ekinlarini ekish uchun yer maydonlarining tayyorlanishi va ekish otryadlarining shakllantirilishi;

2018 yil 25 avgustga qadar har bir hududda ochiq va g‘o‘za qator orasiga don ekish bo‘yicha ko‘rgazmali o‘quv seminarlarini tashkil etilishini ta'minlaydi.

O‘zbekiston Respublikasi Suv xo‘jaligi vazirligi, Qoraqalpog‘iston Respublikasi Vazirlar Mahkamasi va viloyat hokimliklari bilan birgalikda, suvli maydonlarga ekilgan g‘allani peshma-pesh sug‘orishni tashkil etadi va to‘liq ko‘chat undirib olish choralarini ko‘radi.

O‘zbekiston Respublikasi Bosh prokuratura huzuridagi Agrosanoat majmui va oziq-ovqat xavfsizligi ta'minlanishi ustidan nazorat qilish inspeksiyasi g‘alla ekish uchun yerlarning sifatli tayyorlanishi, yer tayyorlashda belgilangan miqdordagi fosforli va kaliyli mineral o‘g‘itlarning yerga solinishi, hududlarning tuproq-iqlim sharoitidan kelib chiqib, belgilangan muddatlarda ekilishini, peshma-pesh sug‘orilishini va boshqa agrotexnik tadbirlarning o‘tkazilishini alohida nazoratga oladi.

“O‘zdonmahsulot” aksiyadorlik kompaniyasi 2018 yil 15 sentabrga qadar Don va dukkakli ekinlar ilmiy-tadqiqot instituti va boshoqli don ekinlari urug‘lari yetishtiruvchi elita urug‘chilik xo‘jaliklari talablaridan kelib chiqqan holda xorijiy ilmiy muassasalardan 5 ming tonna yuqori avlodli urug‘lik donni olib keladi.

“O‘zdonmahsulot” aksiyadorlik kompaniyasi tomonidan chetdan keltiriladigan 5 ming tonna yuqori avlodli urug‘lik don bojxona to‘lovlaridan (bojxona yig‘inlaridan tashqari) ozod etiladi.