Xitoy o‘zining ikkinchi aviatashuvchi kemasini sinovdan o‘tkazdi

Xitoy armiyasi mamlakatdagi ikkinchi aviatashuvchi kemaning dengizdagi sinovlarini muvaffaqiyatli o‘tkazdi. Bu haqda Xitoy mudofaa vazirligi vakili U Tsyan ma'lum qildi. Uning aytishicha, barcha tadbirlar xavfsiz va rejaga ko‘ra amalga oshirilib, ko‘zlangan maqsadlarga erishilgan.
 
Global Times nashrining yozishicha, sinovlar uchuvchi qurilmalarsiz amalga oshirilgan. Ulardan maqsad kema dvigatellari, aloqa, navigatsiya tizimi va boshqa qurilmalarni tekshirish bo‘lgan. Ta'kidlanishicha, qiruvchi samolyotlar va vertolyotlar keyingi sinovlarda qatnashadi. Kemani keyingi yil boshida qurollanishga topshirish rejalashtirilgan.

Bu kema to‘liq Xitoyda ishlab chiqarilgan ilk aviatashuvchidir. U birinchi aviatashuvchi “Lyaonin” kabi loyihalanib qurilgan. “Lyaonin” sobiq ittifoqning “Varyag” aviatashuvchi kreyseri negizida qurib bitkazilgan.

“Lyaonin”ning uzunligi 304 metrni, eni 38 metrni, tezligi 54 km/soatni tashkil qiladi. Kemaning aviatsiya guruhi 26 ta qiruvchi samolyot va 14 ta vertolyotdan iborat.