Maktabgacha ta'lim sohasida davlat-xususiy sherikchilik munosabatlari yanada qo‘llab-quvvatlanadi

Normativ-huquqiy hujjatlar loyihalari muhokamasi portalida Vazirlar Mahkamasining “Maktabgacha ta'lim sohasida davlat-xususiy sherikchilik munosabatlarini yanada qo‘llab-quvvatlashga doir qo‘shimcha chora-tadbirlar to‘g‘risida”gi qarori loyihasi joylashtirildi.

Hujjatga ko‘ra, O‘zbekiston Respublikasi Prezidentining “Maktabgacha ta'lim tizimini yanada rag‘batlantirish va rivojlantirish chora-tadbirlari to‘g‘risida” 2018 yil 5 apreldagi PQ-3651-son qaroriga muvofiq davlat-xususiy sherikchilik shartlari asosida tashkil qilinadigan nodavlat maktabgacha ta'lim muassasalari, muassasasining rahbarlari, metodistlari, tarbiyachilari, defektologlari, psixologlari, musiqa xodimlari ish haqiga sarflanadigan xarajatlarni qoplash uchun davlat maktabgacha ta'lim muassasalari uchun belgilangan shartlarda qo‘shimcha byudjyet subsidiyalari olish huquqiga ega.

Davlat-xususiy sherikchilik shartlari asosida faoliyat yuritadigan nodavlat maktabgacha ta'lim muassasalarining ayrim xodimlari ish haqiga sarflanadigan xarajatlarni qoplash uchun O‘zbekiston Respublikasi Davlat byudjyeti mablag‘laridan subsidiyalar ajratish tartibi to‘g‘risida nizom tasdiqlanishi mumkin.

Nizomga ko‘ra, ta'lim muassasasi tomonidan davlat byudjyetidan subsidiya olish zaruriyati paydo bo‘lganda, subsidiya olish uchun joylashgan hududidan kelib chiqib, Qoraqalpog‘iston Respublikasi Moliya vazirligi, viloyatlar va Toshkent shahar moliya bosh boshqarmalariga ariza bilan murojaat qilinadi.

Arizaga quyidagilar ilova qilinadi:

ariza beruvchining – yuridik shaxs bo‘lgan tadbirkorlik sub'yektining nomi, joylashgan yeri (pochta manzili) va tashkiliy-huquqiy shaklini tasdiqlovchi guvohnoma, tijorat bankidagi hisob raqamlar rekvizitlari;

O‘zbekiston Respublikasi Maktabgacha ta'lim vazirligi bilan davlat-xususiy sherikchilik shartlari asosida ta'lim muassasasini tashkil etish to‘g‘risida imzolangan bitim nusxasi;

ta'lim muassasasining quvvati, faoliyatining boshlanish sanasi, ota-onalar (yoki ularning o‘rnini bosuvchi shaxslar) to‘lovi to‘g‘risidagi ma'lumotnoma.

Moliya organi ta'lim muassasasining arizasi kelib tushgan kundan boshlab yetti kun mobaynida uning mazkur Nizomda belgilangan talablarga mosligini o‘rganib chiqadi va arizani qanoatlantirish yoki uni rad etish to‘g‘risida qaror qabul qiladi va ta'lim muassasasini subsidiyalar ajratish yoki arizani rad etish to‘g‘risida asoslantirilgan holda yozma shaklda xabardor qiladi.

Ta'lim muassasasiga subsidiyalar ajratish moliya organi rahbarining tegishli buyrug‘i bilan rasmiylashtiriladi hamda buyruqda subsidiyani ajratish davri ko‘rsatiladi.

Moliya organi tomonidan ta'lim muassasasiga subsidiya ajratish ta'lim muassasasi va O‘zbekiston Respublikasi Maktabgacha ta'lim vazirligi o‘rtasida subsidiyalarni ajratish to‘g‘risida tuzilgan bitimda ko‘rsatilgan muddat davomida amalga oshirilishi mumkin.

Moliya organi:

ta'lim muassasasi O‘zbekiston Respublikasi Maktabgacha ta'lim vazirligi tomonidan yuritiladigan tegishli reyestrga kiritilmaganligi;

ta'lim muassasasi davlat-xususiy sherikchiligi to‘g‘risidagi kelishuvda belgilangan majburiyatlarning bajarilmasligi sababli Qoraqalpog‘iston Respublikasi maktabgacha ta'lim vazirligi, viloyatlar maktabgacha ta'lim boshqarmalari hamda Toshkent shahar maktabgacha ta'lim bosh boshqarmasi tavsiyasiga ko‘ra subsidiyalar ajratilishini rad etishga haqlidir.

Ta'lim muassasasi tegishli tuman (shahar) moliya bo‘limlariga xar hisobot oyi yakunlari bo‘yicha keyingi oyning 7 sanasiga qadar o‘tgan oyda ta'lim muassasasiga haqiqatda qatnagan bolalar soni to‘g‘risida ma'lumotni hamda ta'lim muassasasida bolalar ta'minoti uchun ota-onalar (yoki ularning o‘rnini bosuvchi shaxslar) tomonidan to‘langan to‘lov hujjatlarini ilova qilgan holda subsidiyalar olish uchun muvofiq shaklda buyurtmanomani taqdim etadi.

Ta'lim muassasasi tomonidan taqdim etilgan buyurtmanomaga asosan xodimlarning haqiqatda ishlagan kunidan hamda davlat maktabgacha ta'lim muassasalari uchun belgilangan lavozim maoshlaridan kelib chiqib subsidiyalar hisoblanadi.

Tuman (shahar) moliya bo‘limlari hududdagi ta'lim muassasalari tomonidan taqdim etilgan buyurtmanomalarni umumlashtirib, subsidiyalarni ajratish uchun muvofiq shaklda O‘zbekiston Respublikasi Davlat byudjyetidan subsidiyalar ajratiladigan ta'lim muassasalarining reyestrini tuzadi va hisobot oyidan keyingi oyning 12 sanasigacha tegishli g‘aznachilik bo‘linmasiga to‘lovni amalga oshirish uchun va yuqori turuvchi moliya organiga ma'lumot uchun taqdim etadi.

G‘aznachilik bo‘linmasi tuman (shahar) moliya bo‘limlari tomonidan taqdim etilgan reyestr asosida tegishli ta'lim muassasasining tijorat banklaridagi hisobvaraqlariga subsidiyalarni belgilangan tartibda o‘tkazib beradi.

Ta'lim muassasalariga subsidiyalar har oy yakunlari bo‘yicha keyingi oyning 15 sanasiga qadar moliya organlariga taqdim qilingan buyurtmanomaga asosan ajratiladi.

Belgilangan muddatda subsidiya olish uchun buyurtmanoma taqdim etmagan ta'lim muassasasiga kechikkan oyi uchun subsidiya ajratilmaydi.

Subsidiyalar tegishli moliya yili uchun Qoraqalpog‘iston Respublikasi byudjyeti, viloyatlar va Toshkent shahar mahalliy byudjyetlari parametrlarida ta'lim sohasi uchun nazarda tutilgan mablag‘lar hisobidan belgilangan tartibda moliya organi tomonidan rejalashtiriladi.

Ta'lim muassasalarining ayrim xodimlarini guruh (9 soatlik ish rejimidagi) sonidan kelib chiqqan holda shtat birliklari davlat maktabgacha ta'lim muassasalarining namunaviy shtatlari uchun guruh soniga qarab belgilanadigan shtat birliklari me'yorlari bo‘yicha aniqlanadi.

Ta'lim muassasalarining ayrim xodimlari ish haqiga sarflanadigan xarajatlarni qoplash uchun subsidiyalar davlat maktabgacha ta'lim tizimi xodimlari uchun belgilangan mehnatiga haq to‘lashning bazaviy tarif stavkalari miqdorlarida hisoblanadi.

Guruhlar sonini belgilashda ta'lim muassasasidagi tarbiyalanuvchilarning umumiy sonidan kelib chiqib, har bir guruhidagi bola soni me'yori kamida 20 nafar bo‘lganda bir guruh sifatida hisobga olinadi.

Bunda, ta'lim muassasasida bolaning bir oy davomida qatnagan kunlari 12 kundan kam bo‘lmasligi lozim.

Yil davomida qonun hujjatlariga muvofiq davlat maktabgacha ta'lim muassasasi ayrim xodimlari ish haqi miqdorlari va shartlari o‘zgargan hollarda, ta'lim muassasalari uchun subsidiyalar o‘zgargan ish haqi miqdoridan hisoblanadi.