Butunjahon ko‘chmanchi xalqlar o‘yinlarining birinchi kunida 11ta medal qo‘lga kiritildi

Qirg‘iziston Respublikasining Cho‘lpon-Ota shahrida bo‘lib o‘tayotgan Butunjahon ko‘chmanchi xalqlar o‘yinlarida ishtirok etayotgan O‘zbekiston vakillari birinchi kungi bahslar yakuniga ko‘ra, jami 11ta medalni qo‘lga kiritishdi.

O‘yinlarning alish kurashi (Qirg‘iziston kurashi) turi bo‘yicha bahslarda 30ta davlatidan tashrif buyurgan 140 nafar sportchi ishtirok etdi. Ushbu sport turi bo‘yicha o‘zbekistonlik sportchilar salmoqli yutuqlarni qo‘lga kiritishdi. 

O‘zbekiston Respublikasi Jismoniy Tarbiya va sport vazirligi matbuot xizmati xabariga ko‘ra, erkaklar o‘rtasida Mardonbek Kimsanov (-60 kg), Husniddin Ro‘ziyev (-70 kg) oltin, Kamollidin Mahkamov (-80 kg), Zaylobiddin Artikov (-90 kg) va Obidali Mavlonov (-100 kg) musobaqaning kumush medalini qo‘lga kiritishgan bo‘lsa, ayollar o‘rtasida o‘tkazilgan bahslarda Maftuna Maxmudova (-60 kg), Dilafruz Mamajonova (-70 kg), Bekzoda Xudaberdiyeva (-75 kg) bronza medalga sazovor bo‘lishdi. 

O‘zbekistonlik sportchilar armrestlingda ham 3ta bronza medalini qo‘lga kiritishgan.

«O‘yinlarning birinchi kunida armrestling va alish kurashi bo‘yicha bahslarda jami 18 nafar sportchimiz ishtirok etib, 11ta medal (2 ta oltin, 3 ta kumush va 6 ta bronza) qo‘lga kiritildi», deyiladi vazirlik xabarida.

Bugun O‘zbekiston vakillari qozoq kurashi, pahlavani (Eron kurashi), goresh (Turkmaniston kurashi), Lochin ovi va Tayganlar yugurishi turlari bo‘yicha bahslarga kirishadi.

Ma'lumot uchun, 2-8 sentabr kunlari o‘tkazilayotgan ushbu musobaqada dunyoning 66ta davlatidan tashrif buyurgan 1556 nafar sportchi ishtirok etmoqda.

Ushbu o‘yinlarda 50ta sport turi bo‘yicha 500dan ortiq komplekt medallar jamlanmasi o‘ynaladi. O‘zbekiston 13ta sport turi bo‘yicha 58 nafar sportchi bilan ishtirok etmoqda.