O‘zbekiston terma jamoasi yarimhimoyachisi Server Jyeparov yaqinda Qozog‘istonning «Jyetisu» klubi bilan shartnoma imzoladi.
O‘zbekiston terma jamoasining yangi bosh murabbiyi Ektor Kuper 35 yoshli futbolchini ilk yig‘iniga taklif qilmadi.
Server Jyeparov shu voqealar yuzasidan Sports.uz nashriga intervyu berdi.
- Server, faoliyatingizni nega Qozog‘istonning «Jyetisu» jamoasida davom ettirishga qaror qildingiz?
- Menda ikkita variant bor edi. Eronda qolish yoki Qozog‘istonda faoliyatni davom ettirish. Eron chempionati nihoyasiga yetganidan so‘ng, «Istiqlol» bilan imzolangan kelishuv ham o‘z kuchini yo‘qotgandi. Shu bois tanish-bilishlarni ishga solgan holda, o‘zimga mos keladigan jamoani qidirishda yordam so‘radim. Ko‘p o‘tmay hammasi oydinlashib, «Jyetisu» varianti yuzaga keldi. Ikki kun davom etgan muzokaralardan keyin ushbu jamoa bilan kelishuvga erishdim. Bosh murabbiy, sport direktori va mening ishtirokimda o‘tgan yakuniy muzokarada hammasini o‘zaro hal qilishga muvaffaq bo‘ldik.
- 35 yoshda legioner bo‘lib o‘ynash qiyin. Shu bois taklifni tanlashda ikkilanmadingizmi?
- Legioner bo‘lish juda qiyin ish. 2010 yildan beri legionerman. Aytish mumkin bo‘lsa, bunga ko‘nikib ketdim. Shu sabab «Jyetisu» bilan kelishuvga erishish unchalik murakkab bo‘lmadi. Qolaversa, sakkiz yildan beri chetda yuraverganim tufayli, yangicha shart-sharoit va muhitga ko‘nikma hosil qilishim oson kechmoqda. «Jyetisu» varianti borasida uzoq o‘ylanishimga to‘g‘ri kelmadi. Men munosib taklif kelib tushishini kutgandim xolos.
- Milliy terma jamoamiz yangi bosh murabbiy – Ektor Kuper boshchiligida yig‘inni boshlagan. Ammo u sizni bo‘lajak o‘yinlar uchun chaqirmadi. Ayting-chi, termadagi faoliyatingizni yakunlash haqida o‘ylayapsizmi?
- Milliy terma jamoamizni tajribali murabbiy qabul qilib olganidan juda xursandman. Uning terma jamoaga meni chaqirmagani masalasiga kelsak, hammasini to‘g‘ri qabul qilish kerak. Axir bosh murabbiy jamoaga kimlarni chaqirishni o‘zi hal qiladi. Chunki har bir mutaxassisning o‘yinni tashkil etish borasida o‘z g‘oyalari bo‘ladi. Men terma jamoadagi faoliyatimni tugatish niyatim yo‘q. Bu o‘z navbatida klub miqyosidagi faoliyatimga ham taalluqlidir. Sababi, o‘zimni juda yaxshi his qilyapman. Shuning evaziga klubim oldiga qo‘yiladigan vazifalarni bajarishda foydam tegishi mumkinligiga ishonaman. Men buni «Istiqlol»da to‘p surib yurgan chog‘imda ham isbotladim. Ushbu jamoa bilan Osiyo Chempionlar ligasi chorakfinaliga chiqdim.
