Oxirgi 50 yilda ta'lim sohasida erishilgan yutuqlarga qaramay, sayyoramiz aholisining kattagina qismi savodsiz bo‘lib qolmoqda.
YuNeSKO ma'lumotlariga ko‘ra, dunyoda 750 mln kishi yozish va o‘qishni bilmaydi. Bundan uchdan ikki qismini ayollar tashkil qilmoqda. Shu bilan birga oxirgi 50 yil ichida yoshlar o‘rtasida savodxonlik darajasi oshayotgani qayd qilinmoqda.
Aniqlanishicha, savodsiz odamlarning 45 foizi Janubiy Osiyoda, 27 foizi Afrikada (Sahroi Kabirdan janubda), 10 foizi Sharqiy va va Janubi-sharqiy Osiyoda, 9 foizi Shimoliy Afrika va G‘arbiy Osiyoda, 4 foizi Lotin Amerikasi va Karib dengizi davlatlarida yashaydi.
YuNeSKOning statistika instituti ma'lumotlariga ko‘ra, oxirgi vaqtda aholi o‘rtasida savodxonlikning eng yuqori o‘sishi Sharqiy va Janubiy Osiyo hamda Shimoliy va G‘arbiy Afrika aholisi o‘rtasida qayd qilingan.
Janubiy Osiyoda aholi savodxonligi 1990-2016 yillarda 46 foizdan 72 foizga, Shimoliy Afrika va G‘arbiy Osiyoda 64 foizdan 81 foizgacha o‘sgan.
Sharqiy va Janubi-sharqiy Osiyoda bu ko‘rsatkich 82 foizdan 96 foizgacha, Afrikaning Sahroi Kabirdan janubda joylashgan davlatlarida 52 foizdan 62 foizgacha o‘sgan.
Shu bilan birga mutaxassislar ayollar o‘rtasida savodxonlik darajasi erkaklarga nisbatan pastroq ekanini qayd qilishgan. Oxirgi ma'lumotlarga ko‘ra, savodsizlarning 59 foizini yosh ayollar tashkil qiladi.
