Yevropa davlatlari Isroilni ogohlantirishdi

Fransiya, Germaniya, Italiya, Ispaniya va Buyuk Britaniya Xon al-Ahmar qishlog‘ini yo‘q qilish sabab kelib chiqadigan oqibatlar haqida Isroilni ogohlantirishdi, deb xabar bermoqda RIA Novosti qo‘shma bayonotga tayangan holda.

Al-Qudus bilan qo‘shni bo‘lgan Xon al-Ahmar qishlog‘i va O‘lik dengizga olib boruvchi yo‘lni isroilliklar noqonuniy qurilma deb e'lon qilib, uni buzishga tayyorlanishmoqda, u yerda yashovchi qariyb 200 nafar falastinlik esa majburiy ravishda ko‘chirilishi mumkin. Bu xorijdan ko‘plab qarshiliklar yuz berayotganiga qaramay sodir bo‘lishi ehtimolga yaqin. Avvalroq, Isroil Oliy sudi buzishga qarshi bo‘lgan mahalliy aholi petitsiyasini rad etdi.

«Biz diplomatiya rahbari, vitse-prezident (YeI) Frederika Mogeriniga qo‘shilamiz. U bizning Isroil hukumatiga qishloqni yo‘q qilish rejasiga ko‘ra ish tutmaslik va aholini ko‘chirmaslik bo‘yicha chaqirig‘imizni qaytarmoqda», - deyiladi bayonotda.

Hujjatga ko‘ra, «buzish va ko‘chirishning oqibati juda jiddiy bo‘ladi, ular bu hamjamiyat aholisiga, jumladan, ularning bolalariga aloqador bo‘lib, ikki davlatni yaratish to‘g‘risidagi qaror istiqbollariga ham ta'sir ko‘rsatadi».

Xon al-Ahmarni buzishga tayyorgarlik ishlariga avvalroq YeI va BMTning turli tuzilmalari protest bildirdi, ular Isroil hukumatining rejalarini Yaqin Sharqdagi muammolarga yechim topish istiqbollari uchun tahdid, deb atashdi. Ularning ta'kidlashicha, qishloq Al-Qudus va Maale-Adumim yahudiylar yashash joyi o‘rtasidagi Ye-1 zonasining bir qismi sanalib, u «bo‘lajak Falastin davlati hududiy yaxlitligi uchun muhim ahamiyat kasb etadi».