Hukumat qarori: O‘simliklar klinikalari faoliyati tashkil etiladi

Vazirlar Mahkamasining “O‘simliklar klinikalari faoliyatini tashkil etish chora-tadbirlari to‘g‘risida”gi qarori qabul qilindi.

Hujjat bilan O‘simliklar klinikalarini tashkil etish to‘g‘risidagi nizom tasdiqlandi.

Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari:

bir oy muddatda va har yili 1 fevralgacha davlat-xususiy sheriklik shartlarida o‘simliklar klinikalarini qurish, rekonstruksiya qilish va jihozlash uchun ajratilishi kerak bo‘lgan yer uchastkalarini belgilaydilar, shuningdek, tasdiqlangan yer uchastkalari ma'lumotlari ro‘yxatlarini Vazirlar Mahkamasi huzuridagi O‘simliklar karantini davlat inspeksiyasiga taqdim etadilar.

O‘simliklar klinikalari faoliyatini tashkil etish tartibi to‘g‘risidagi nizomga ko‘ra, o‘simliklar klinikasi yuridik shaxs tarzida yoki yuridik shaxsning tarkibiy bo‘linmasi (filiali) shaklida, shu jumladan, davlat-xususiy sheriklik shartlari asosida tashkil etiladi.

O‘simliklar klinikalari faoliyatini tashkil etish sohasida davlat-xususiy sheriklik shakllari quyidagi tarzda amalga oshiriladi:

davlat mulkining foydalanilmayotgan bo‘sh turgan obektlarini “nol” xarid qiymati bo‘yicha sotish;

davlat mulki obektlarining foydalanilmayotgan binolarini uzoq muddatga bepul foydalanishga berish;

bitimda ko‘rsatilgan shartlarda qurilish, rekonstruksiya qilish va jihozlash uchun yer uchastkasi ajratish.

Quyidagilar o‘simliklar klinikalari faoliyatini tashkil etishda asosiy talablar hisoblanadi:

a) shu jumladan, zararsizlantirish bo‘yicha kamida to‘rt nafar kishidan iborat otryadlar tashkil etish hisobiga o‘simliklarga agrotexnik, biologik va kimyoviy ishlov berish xizmatlari ko‘rsatish;

b) qishloq xo‘jaligi ishlab chiqaruvchilari va aholini o‘simliklarni himoya qilishning kimyoviy, biokimyoviy, biologik va mexanik vositalari, o‘simliklar zararkunandalari va kasalliklariga qarshi kurashish bo‘yicha vositalar, shu jumladan:

feromon tutgichlar;

zararkunandalarga qarshi kurashish uchun biomahsulotlar;

gerbitsidlar, fungitsidlar, instektitsidlar, insektoakaritsidlar, nematotsidlar va biopreparatlar bilan ta'minlash;

v) uzluksiz sotishni ta'minlash uchun kimyoviy, biokimyoviy, biologik, mexanik vositalar, priborlar va preparatlarning minimal assortimenti majburiy mavjud bo‘lishi;

g) binolar va xonalarga qo‘yiladigan ekologik talablar, sanitariya normalari, qoidalari va gigiyenik normativlarga rioya qilish;

d) zararkunandalar, kasalliklar va begona o‘tlarni aniqlash uchun tegishli laboratoriya uskunasi, inventar mavjud bo‘lishi, shuningdek, o‘simliklarga ishlov berish uchun kimyoviy, biokimyoviy va biologik vositalarni tayyorlash va qadoqlash.

O‘simliklar klinikalarida mavjud bo‘lishi majburiy bo‘lgan kimyoviy, biokimyoviy, biologik, mexanik vositalar, priborlar va preparatlarning minimal assortimenta ro‘yxati Inspektsiya tomonidan tasdiqlanadi va (yoki) bitimda nazarda tutiladi.

O‘simliklarga agrotexnik, biologik va kimyoviy ishlov berish bo‘yicha xizmatlar ko‘rsatish, shuningdek, o‘simliklar zararkunandalari va kasalliklariga qarshi kurashish bo‘yicha qishloq xo‘jaligi ishlab chiqaruvchilari va aholini kimyoviy, biokimyoviy, biologik va mexanik vositalar bilan ta'minlash o‘simliklar klinikalarining asosiy vazifalari hisoblanadi.

O‘simliklar klinikalari quyidagi funksiyalarni amalga oshiradilar:

keyinchalik sotish uchun belgilangan tartibda muvofiqlik sertifikatlariga ega bo‘lgan o‘simliklarni himoya qilishning kimyoviy, biokimyoviy, biologik va mexanik vositalarini xarid qiladilar;

belgilangan tartibda o‘simliklarni himoya qilishning kimyoviy, biokimyoviy, biologik va mexanik vositalarini saqlashni, yo‘q qilishni ta'minlaydilar;

tegishli hududda o‘simliklar karantini obektlari aniqlanishi hamda o‘simlik dunyosi kasalliklari va zararkunandalari tarqalishi holatlari to‘g‘risida Inspektsiyani xabardor qiladilar, Inspektsiyaning murojaati bo‘yicha amaliyotda uchraydigan o‘simliklar zararkunandalari va kasalliklari to‘g‘risida axborot taqdim etadilar;

o‘simliklarni himoya qilishning kimyoviy, biokimyoviy, biologik vositalari va mexanik vositalarini qo‘llash va saqlash bo‘yicha aholiga bepul maslahatlar beradilar va axborot yordami ko‘rsatadilar;

o‘simliklarga agrotexnik, biologik va kimyoviy ishlov berish bo‘yicha zarur xizmatlarni ko‘rsatish uchun o‘simliklar zararkunandalari va kasalliklar turlarini aniqlaydilar.

O‘simliklar klinikalarining faoliyatini, shu jumladan, davlat-xususiy sheriklik shartlaridagi klinikalar faoliyati monitoringini olib borish Inspektsiya tomonidan amalga oshiriladi. O‘simliklar klinikalari faoliyati monitoringini olib borish tartibi Inspektsiya tomonidan tasdiqlanadi va (yoki) bitimda nazar da tutiladi.