Xitoy energetika boshqarmasi rahbari korrupsiyada ayblandi. U uyg‘ur ekani aytilyapti

Xitoy Kommunistik partiyasining tartib-intizomni tekshirish bo‘yicha Markaziy komissiyasi Xitoy davlat energetika boshqarmasi rahbari Nur Bekriga nisbatan surishtiruv boshladi, deb xabar bermoqda OAV.

Ehtimoliy qonunbuzilish holatlari haqida ma'lumotlar keltirilmayapti. Faqatgina gap «partiya intizomini jiddiy buzish» haqida ketayotgani aytiladi. Xitoyda bu korrupsiya bilan bog‘liq jinoyat ekanligini anglatadi.

OAV ma'lumotlariga ko‘ra, Nur Bekri millati bo‘yicha uyg‘ur bo‘lib, mamlakat shimoli-g‘arbidagi Shinjon-Uyg‘ur muxtor tumanida tug‘ilgan. U 57 yoshda. Davlat energetika boshqarmasi rahbari lavozimidan tashqari, Davlat taraqqiyot va islohotlar qo‘mitasi rahbarining o‘rinbosari lavozimida ham faoliyat yuritadi.

Eslatib o‘tamiz, avvalroq Xitoyda uyg‘urlar uchun «qayta tarbiyalash lagerlari» borligi ma'lum qilingandi.