Xitoy Ukrainaga sovg‘a jo‘natdi

Ukraina va Xitoy 24 sentabr, dushanba kuni Ukraina tomonining beg‘araz yordam olishi to‘g‘risidagi memorandumni imzoladilar. Bu haqda Ukraina sog‘liqni saqlash vaziri vazifasini bajaruvchi Ulyana Suprun feysbukdagi sahifasida yozgan.

Imzolangan hujjat doirasida Ukraina zamonaviy tibbiy uskunalar bilan jihozlangan 50ta tez tibbiy yordam avtomobilini oldi. Ta'kidlanishicha, oltita avtomobil Ichki ishlar vazirligi va Milliy gvardiyaga beriladi, qolganlari esa Ukrainaning turli hududlariga yuboriladi.

«Ukraina hukumati va Xitoy Xalq Respublikasi o‘rtasidagi hamkorlikda tez tibbiy yordam brigadalarini jihozlash bo‘yicha tibbiy asbob-uskunalarga oid loyihaning amalga oshirilishi navbatdagi qadamga aylandi. Kelishuv doirasida Ukraina 3,5 million dollarlik qiymatdagi tibbiy uskunalar bilan jihozlangan 50ta tez tibbiy yordam mashinasini oldi», - deya yozadi Suprun.

Shuningdek, Xitoy Xalq Respublikasining favqulodda va muxtor elchisi Du Veyning ta'kidlashicha, tez yordam avtomobillari Ukraina tomonidan 2016 yilda imzolangan kelishuv asosida qabul qilib olingan.

Eslatib o‘tamiz, avvalroq Poroshenko Ukrainaning Rossiya bilan kurashdagi o‘rni haqida gapirgandi.