Qishki transferlar vaqtida ham jiddiy xaridlar amalga oshiriladi. Bu vaqtda futbolchilarning narxi ko‘tarilib ketadi, chunki, klublar mavsumning birinchi qismidagi yo‘qotishlari o‘rnini to‘ldirish payiga tushib qolishadi. Quyida qishda top-chempionatlarda paydo bo‘lishi mumkin bo‘lgan 10 futbolchi ko‘rib chiqiladi.
Anderson Taliska - 24 yosh
Qayerda o‘ynaydi: «Guanchjou Evergrand» («Benfika»dan ijara asosida)
Qaysi jamoaga o‘tishi mumkin: kim katta maosh to‘lashga rozi bo‘lsa.
Taliskani «Manchester Yunayted»da kutishmoqda, u o‘tgan yil qishida «Roma»ga o‘tishi mumkin edi – ammo u o‘shanda «Beshiktosh»ga yo‘l oldi va ajoyib mavsum o‘tkazdi. Ammo yozda Anderson «Guanchjou»ga o‘tib ketdi. «Beshiktosh» prezidenti bundan hayron bo‘lmagani – Taliskani faqat pul qiziqtirishi haqida aytdi.
Braziliyalik yarimhimoyachi nomi ancha vaqtdan buyon top-ligalar bilan bog‘lanmoqda. U maydonda ko‘p ishni bajara oladi: to‘pni o‘zida olib yurishi, jarima zarbalarini ijro etishi, uzoq masofalardan va bosh bilan darvoza tomon aniq zarba berishi mumkin. Xitoy Superligasida u 14 o‘yinda 14 gol urib, 2 golga assistentlik qildi. Agar Yevropa klublari ko‘p muammolarini bitta transfer orqali hal qilmoqchi bo‘lsa, shu futbolchini o‘z tarkibiga qo‘shib olishi kerak bo‘ladi.
Frenki De Yong - 21 yosh
Qayerda o‘ynaydi: «Ayaks»
Qaysi jamoaga o‘tishi mumkin: «Barselona», «Manchester Siti»
«Ayaks» futbolchisi bugungi kunda eng talabgir futbolchiga aylangan. Amsterdamliklar jamoasi uni yozda tarkibda saqlab qoldi va jamoasi yangi mavsumda ham kuchli futbol namoyish etmoqda. Ayni vaqtda Frenki De Yong jamoa motoriga aylangan. Bu 21 yoshli yarimhimoyachini Xavi va Busketsga qiyoslashmoqda: Frenki jamoaning aniq paslar uzatish borasidagi yetakchi futbolchisi, u raqib o‘yinini aniq o‘qiy oladi va muvaffaqiyatli himoyalanadi.
Matteys De Ligt
Qayerda o‘ynaydi: «Ayaks»
Qaysi jamoaga o‘tishi mumkin: har qanday top-klubga mos keladi
Matteys – yosh, bo‘ychan va aniq pas uzatuvchi himoyachi. De Ligt hali 19 yoshda bo‘lishiga qaramasdan ikki yildan buyon «Ayaks»ning asosiy tarkibida o‘ynamoqda. U o‘yinni o‘qishga harakat qiladi, ammo ba'zan unga konsentratsiya yetishmaydi. Buni to‘g‘rilash uchun unda vaqt ko‘p – u hali har qanday jamoa himoyachisi yetakchisi bo‘lish salohiyatiga, keyingi 10-15 yil davomida barqaror to‘p surish imkoniyatiga ega. Unga ayni vaqtda «Barselona» va «MYu» klublaridan jiddiy qiziqish mavjud. Futbolchining o‘zi Ispaniya chempionatida to‘p surishni istaydi.
David Neres - 21 yosh
Qayerda o‘ynaydi: «Ayaks»
Qaysi jamoaga o‘tishi mumkin: «Bavariya» yoki qanot hujumchilari bilan muammolarga ega boshqa jamoalar
U «Ayaks»ning a'lo darajadagi starti sababchilaridan yana biri. Neresni braziliyalik yosh futbolchilar orasida eng talantlilardan biri deb hisoblashmoqda va Titedan uni terma jamoaga chaqirishni so‘rashmoqda. Chempionlar ligasining 2-turida Neres «Bavariya»ga qarshi o‘yinda o‘zini yaxshi tomondan ko‘rsatdi. Myunxenliklar jamoasi endi uni o‘z tarkibiga qo‘shib olish haqida o‘ylamoqda – nemislar jamoasi Frank Riberiga o‘rinbosar topishlari kerak.
Xuan Kintero - 25 yoshda
Qayerda o‘ynaydi: «River Pleyt»
Qaysi jamoaga o‘tishi mumkin: qaysi jamoaga yarimhimoya chizig‘ida magiya yetishmayotgan bo‘lsa
Xuan Kintero Rossiyada o‘tkazilgan jahon chempionatida Kolumbiyaning asosiy yetakchisi bo‘ldi, hozirda esa «River Pleyt»ni Libertadores Kubogida g‘alaba tomon olib bormoqda. Uning paslari o‘yinni bezaydi, u jarima nuqtasidan kuchli zarba bilan raqib darvozabonini ojiz qoldirishi mumkin. Ikki yil muqaddam Kintero «Portu» zaxirasida qolib ketgandi, u endi Yevropaga qaytib, o‘zining haqiqiy salohiyatini namoyon etishga tayyor.
Pedro Abreu - 21 yosh
Qayerda o‘ynaydi: «Fluminense»
Qaysi jamoaga o‘tishi mumkin: kim mart-aprel oylarigacha kutishga rozi bo‘lsa
Pedro – Braziliya futboliga xos bo‘lmagan markaziy hujumchidir. Balki aynan u jahon chempionatida Tite jamoasiga yetishmagandir. Pedro joriy mavsumda Braziliya chempionatining 19 uchrashuvida maydonga chiqib, 10 gol urishga ulgurdi va unga Madridning «Real» klubidan taklif kelmoqda. Faqat u jarohat oldi va endi faqat mart oyiga borib maydonga tushishi mumkin. Ammo kimdir kutsa va tavakkal qila olsa, top-forvardni qo‘lga kiritishi mumkin.
Sebastyan Koates - 28 yosh
Qayerda o‘ynaydi: «Sporting»
Qaysi jamoaga o‘tishi mumkin: APLdagi top-6dan tashqaridagi istalgan jamoaga
Sebastyan «Liverpul»da va «Sanderlend»da o‘rnashib qololmagandi. Ammo «Sporting»da u o‘z faoliyatini qaytadan boshlay oldi. U hozirda jamoasining eng yaxshi himoyachisi va jismoniy formasini cho‘qqisida. «Sporting» shu yozda asosiy yetakchilaridan ayrildi, shu tufayli Koates ham ketish taraddudiga tushgan va takliflar kutmoqda.
Amadu Xaydara - 20 yosh
Qayerda o‘ynaydi: «Red Bull Zaltsburg»
Qaysi jamoaga o‘tishi mumkin: «RB Leyptsig»
Malilik Amadu Xaydaraning taqdiri «Red Bull Zaltsburg»ning Yevropa Ligasi doirasida «Red Bull Leyptsig»ga qarshi o‘yinidan keyin ma'lum bo‘lgandi. Bir kompaniya homiyligidagi ikki klubning to‘qnashuvida Amadu «Leyptsig» yarimhimoyasini ojiz qoldirdi. O‘yindan keyingi muzokaralarda esa bu yosh futbolchi shu qishda Germaniyaga ko‘chib o‘tishi masalasi muhokama qilindi. Xaydarani Nabi Keyta bilan tenglashtirishmoqda va uni jahonning eng yaxshi yosh futbolchisi sovrini uchun da'vogarlar qatoriga kiritishmoqda.
Alfredo Morelos - 22 yosh
Qayerda o‘ynaydi: «Reyndjyers»
Qaysi jamoaga o‘tishi mumkin: hujum chizig‘i sekin harakat qiladigan jamoa
Kolumbiyalik Alfredo – kichik britan forvardlarining tipik namunasidir. U tezkor, yetarlicha texnar, bosh bilan ham yaxshi o‘ynaydi (bo‘yi pastligiga qaramasdan) va jamoasining birinchi himoyachisi bo‘lishga tayyor, u raqib hujum boshlayotganida yetarlicha faollik ko‘rsatib, hujumni boshidayoq to‘xtatishi mumkin. U hali 22 yoshda va mavsum boshida 11+6 ko‘rsatkichini qayd etmoqda – uni «yangi Falkao» deb ko‘rishmoqda.
Meyson Maunt - 19 yosh
Qayerda o‘ynaydi: «Derbi Kaunti» («Chelsi»dan ijaraga olingan)
Qaysi jamoaga o‘tishi mumkin: «Sauthempton» yoki «Bornmut» darajasidagi klubga
O‘tgan mavsumni Meyson «Vitess»da o‘tkazgan va uni Lempard bilan qiyoslay boshlashgandi. Bu mavsumda «Chelsi» Mauntni aynan Lempard bosh murabbiy bo‘lgan «Derbi Kaunti»ga ijaraga jo‘natdi. Frenk qo‘li ostida bu yigitcha yanada ochilmoqda: u chempionshipning barcha o‘yinlarida maydonga tushmoqda, u hozircha 3 gol urgan va bir golga uzatma bergan. U hozir o‘zining nostandart harakatlari bilan jamoasiga yordam berib kelmoqda, ko‘p o‘tmay u top-klublardan biridan taklif olishi kutilmoqda.
