Kreml Putinning yadro zarbasidan keyingi «jannat» haqidagi so‘zlariga izoh berdi

Rossiya prezidenti matbuot kotibi Dmitriy Peskov Vladimir Putinning yadro zarbasidan keyin «biz jannatga tushamiz», dushmanlar esa «shunchaki o‘lib ketadi», degan so‘zlariga izoh berdi.

Vladimir Putin bu haqda «Valday» muhokamalar klubi yalpi sessiyasida aytib o‘tdi. Peskovning ma'lum qilishicha, prezident jannat va kim qayerga tushishi haqida gapirmagan, deb xabar qilmoqda RBK muxbiri.

«Ko‘pchilik bir narsani e'tibordan chetda qoldirdi, Rossiya doktrinal darajada o‘zida ogohlantiruvchi zarba berish huquqini saqlab qolmaydi», - dedi davlat rahbari matbuot kotibi.

Peskovning aniqlik kiritishicha, Rossiya ogohlantiruvchi zarba bera olmaydi. «Ammo bizga yadro qurolidan foydalangan holda hujum qilishsa yoki davlatning mavjudligi tahdid ostida qolsa, unda Rossiya yadro qurolidan foydalanishga o‘zini haqli, deb hisoblaydi. Agar bizga hujum qilishsa, raqiblarning «ba'zilari jannatga, ba'zilari jahannamga tushadi», - dedi u.

O‘tgan hafta klub sessiyasida so‘zlagan Putin Rossiyada raketa hujumi haqida yadroviy ogohlantirish tizimi borligini eslatdi. «Biz Rossiya hududiga hujum boshlanganiga ishonch hosil qilsak, shundan so‘ng javob zarbasini beramiz. Albatta, bu butun jahon darajasidagi halokat bo‘ladi, ammo biz buning tashabbuskori bo‘lmaymiz. Tajovuzkor tomon qasos muqarrarligini bilishi kerak. Biz, xuddi shahidlar kabi, jannatga tushamiz, ular esa shunchaki o‘lib ketadi, sababi tavba qilishga ham ulgurishmaydi», - degandi Putin.

Rossiyaning amaldagi harbiy doktrinasida (2014 yil, 27-band) aytilishicha, mamlakat «o‘ziga va (yoki) uning ittifoqchilariga yadroviy hamda boshqa ommaviy qirg‘in qurollari qo‘llansa, bunga javoban yadro qurolidan foydalanish huquqini o‘zida saqlab qoladi».