Avvalgilarga o‘xshamas. El Klasikoni ko‘rish uchun 5 sabab

Bugun Toshkent vaqti bilan soat 20:15da, Ispaniya chempionati 10-tur doirasida «Real» «Kamp Nou»da «Barselona» mehmoni bo‘ladi. Aslida bu o‘yin alohida ta'rifga muhtoj emas, ammo Krishtianu Ronalduning ketishi va Lionel Messining jarohat olishi natijasida, so‘nggi 11 yilda ilk bor El Klasiko ushbu superyulduzlarsiz o‘tmoqda. Ammo agar vaziyatga boshqa tarafdan qaralsa, bu vaziyatga ham ijobiy qarash va bugungi o‘yin oldingilardan yaxshi ma'noda farqliroq bo‘lishiga sabablar topish mumkin ekan. Qo‘yida shu haqida.

Yangi qahramon kim bo‘ladi?

Aslida bu omil o‘yinga bo‘lgan qiziqishni orttirishi ham mumkin. Nihoyat, barcha e'tibor jamoalarga qaratiladi. Avvallari, mana shu o‘n bir yil ichida Zlatan Ibrahimovich, Suares yoki Neymar, Beyl yoki Asensio va hatto Jyeremi Matyo qahramon bo‘lgan o‘yinlarning guvohi bo‘lganmiz. Lekin bilasizmi, o‘sha o‘yinlarda ham barcha kameralar Messi va Ronalduga qaratilar, oldindan bu futbolchilardan nimadir kutilar edi. Yuqorida tilga olingan qahramonlar esa, aynan mana shu e'tiborsizlikdan foydalanib qolishardi.

Hozirgi holat boshqacha. Har bir futbolchi yangi qahramonga aylanishi mumkin. Kimdir Iskodan nimadir kutsa, boshqalar, nihoyat Koutino barchasini o‘z qo‘liga olish kerak deb hisoblamoqda. Ba'zilar Garet Beyl yoki Benzema o‘zlarini isbotlash vaqti kelganini aytsa, narigi tarafdan Vidalni asosiy tarkibda kutayotganlar bor.

Xullas, bugungi El Klasiko rejissyorlariga qiyin bo‘ladi. O‘yin oldidan kameralarni aynan qaysi futbolchiga qaratish, kimga urg‘u berish borasida biror to‘xtamga kela olmayotganliklari shubhasiz.

Murabbiylar

Bunday vaziyatdan chiqib ketishning yo‘li - ingliz hamkasblari tajribasidan foydalanish. Ya'ni, bor e'tiborni o‘yinning haqiqiy rejissyorlari bo‘lmish murabbiylarga qaratish mumkin. To‘g‘ri, Lopetegi va Valverde El Klasikoning afishasida rasmi chiqadigan darajada marketingbop emas. Ammo anchadan beri ilk marotaba maydonning har ikki tarafida ham asosan o‘yin konsepsiyasini yaratishga urg‘u beradigan murabbiy turibdi. «Barselona» bunday murabbiylarga vaqti-vaqti bilan murojaat qilib turgan, lekin Peres ishga olgan murabbiylarning deyarli hammasi asosan yulduz futbolchilar bilan til topish, jamoaning umumiy tayyorgarligini va motivatsiyasini bir maromda ushlab turish bilan shug‘ullanar edi. Anchelotti, Mourino, Zidan va hatto Kapello ham o‘z o‘yin falsafasiga va aniq seziladigan uslubiga ega emasdi. Kichik o‘yinlarni umumiy tayyorgarlik va klass hisobiga, katta o‘yinlarni esa konkret raqibga mos taktika evaziga yutishga urinadigan murabbiylar edi ular.

Peres urfga aylangan futbolchilar bilan maqtanish o‘rniga, endi boshqa yo‘ldan boryapti - asosiy maqsad urf bo‘la oladigan o‘yin namoyish qilinsinki, bu g‘oya ichidagi Asensio ham, Isko yoki Vaskes ham jahon yulduzlariga aylansin. Ispaniya terma jamoasida juda yaxshi o‘yin yaratgan Lopetegining taklif qilinishi ham shundan edi.

Uning bugungi raqibi Valverdeni ham Bilbaodagi ishlari orqali ajoyib taktik murabbiy sifatida bilamiz. Uning g‘oyalari ba'zida Messining buyukligi soyasida qolayotgan bo‘lishi mumkin, ammo taqdirning hazilini qarangki, aynan «Real»ga qarshi o‘yin oldidan Messi yo‘q. Demak bugun avvalgi Klasikolarga o‘xshamaydigan o‘yinni, maydondagi yulduzlar emas, maydon chetidagi ikki taktikning kurashini ko‘rishimiz mumkin.

Pep Gvardiola va Joze Mourino davridan beri El Klasiko murabbiylari bugun kabi asosiy planda bo‘lmagan edi.

Bosim

Peresning o‘zgarayotganini har qancha gapirmaylik, uning ham sabr kosasi bor. «Real» «Levante», «Viktoriya» kabi jamoalar bilan ham qiynalib o‘ynayotgani jamoatchilik fikrini alangalatib yuborayotgani va bu ham Peresga ta'sir qilishi bor gap. «Real»da o‘tish yillari bo‘lmaydi, bu yerda har doim sovrin va g‘alabalar talab qilishadi. Shu nuqtai nazardan Xulen Lopetegining kursisi qimirlab qolgan bo‘lishi ehtimol.

Bu nimani anglatadi? «Real» bugun shunchaki, qoniqarli natija qayd etish bilan birgalikda, to‘g‘ri yo‘lda harakatlanayotganini ham namoyish etishi kerak bo‘ladi. Balki, aynan shu o‘yin Lopetegining to‘g‘ri tanlov ekanini isbotlaydigan so‘nggi imkoniyat bo‘lishi mumkin. Ya'ni, Lopetegi faqat bugungi o‘yin va raqibdan kelib chiqib, yopiq taktika tanlashi va qandaydir ssenariyga umid qilishi mumkin emas. U raqib kuchli bo‘lishiga qaramasdan natijani o‘z uslubi, o‘yini bilan qo‘lga kiritishiga to‘g‘ri keladi.

Oldingi Klasikolarda masalan, jamoalardan biri qandaydir farq bilan oldinga chiqib ketgan, raqib jamoa ta'qibchi maqomida bo‘lardi. Yana ko‘pincha, jamoalardan birini durang qoniqtirar edi. Bugun unday emas. Birinchidan, mavsum boshi, ochkolar farqi ham katta emas, «Atletiko» va «Sevilya» bor, demak o‘yin turnir jadvalida yetakchilikni qo‘lga olish imkoniyatini beradi. Ikkinchidan, «Barselona» kamida o‘z maydonida o‘ynayotgani, «Real» esa, yuqorida sabablardan kelib chiqib, faqat g‘alaba uchun o‘ynashi aniq.

Boshqa tomondan bu o‘yin murabbiyning iste'fosiga sabab bo‘lishi ehtimol. Bunday ssenariyni ham hamma jonli kuzatishni istasa kerak.

Translyatsiya

La Liga matbuot xizmatining xabar berishicha, ushbu o‘yinda yangi texnologiya qo‘llanadi. Ushbu texnologiya yordamida muxlislar to‘p tepilayotgandagi ovozlarni ham eshita olishlari va jarayonni yanayam yaqinroq his qilishlari mumkin. Ushbu texnologiya avtomatik ravishda to‘p joylashuvini aniqlab, o‘sha zonaga eng yaqin joylashgan mikrofonni ishga tushiradi. Lekin futbolchilarning o‘zaro gaplashish yo baqirish ovozlari eshitilmaydi.

Esingizda bo‘lsa, bir necha yil oldin aynan El Klasiko o‘yinida ilk bora 3D texnologiyalari yordamidagi translyatsiya amalga oshirilgandi. 

Vaqt

«Kamp Nou»dagi o‘yinlar hamyurtlarimiz uchun juda noqulay vaqtda o‘tadi odatda. Buning ustiga Yevropada bugundan qishki tizimga o‘tilayotgani tufayli, o‘yinlar yana bir soatga surilayotganini ham e'tiborga oling. Ammo so‘nggi yillarda La Liga marketing siyosati sababli osiyolik muxlislar haqida ham qayg‘ura boshladi.

Ya'ni, Toshkent vaqti uchun soat 20:15 biz uchun juda qulay. Bemalol, barcha ishlarni bitirib, kechki taomni yeb, televizor qarshisiga ulgurish uchun ideal vaqt. Vodiyliklar Farg‘onadagi O‘zbekiston kubogi finalini jonli tomosha qilib qaytishga ham ulgurishadi.

Hatto «Everton»ga qarshi o‘yini soat 21:00da boshlanadigan «Manchester Yunayted» fanatlari ham bemalol El Klasikoni to‘liq ko‘ra oladi. Agar Mourino shogirdlari faqat ikkinchi bo‘limlarda futbol o‘ynayotganliklaridan kelib chiqsak...

«Kamp Nou»dagi an'ana

Darvoqe, Madrid klubi muxlislari uchun yana bir yoqimli holat. «Barselona» uch yildan buyon o‘z maydonidagi El Klasikolarni g‘alaba bilan yakunlay olmayapti. Bunday o‘yinlar soni 4taga yetgan. Shu yilning may oyida bo‘lib o‘tgan uchrashuvda 2:2 hisobi qayd etilgan bo‘lsa, undan oldin Superkubok uchun bahsda madridliklar 1:3 hisobida yutib ketishgandi. Undan oldingi mavsumdagi ikki o‘yin esa, 1:2 va 1:1 hisoblarida yakunlangan. Qizig‘i, Madriddagi o‘yinlarda «Barselona» uch o‘yindan beri faqat g‘alaba qozonib kelmoqda.

Barcha musobaqalar tarixida esa, ustunlik «Real» tomonda. «Qirollik klubi» 237 uchrashuvdan 95tasida g‘alaba qozongan. Kataloniyaliklar hisobida 92 g‘alaba bor. 50 o‘yin durang bilan yakunlangan.

Eng yirik hisob 1943 yilda, Ispaniya kubogi yarim finalida qayd etilgan. O‘shanda madridliklar 11:1 hisobida ustun kelgan.

Taxminiy tarkiblar:

«Barselona»: Ter Shtegen, Samedu, Langle, Pike, Alba, Buskets, Artur, Rakitich, Koutino, Dembele, Suares

«Real»: Kurtua, Nacho, Ramos, Varan, Marselo, Kazemiro, Kross, Modrich, Isko, Beyl, Benzema.

Q.Aslanov