Zidanda 3ta grand klubdan taklif bor

OkDiario nashri direktori Eduardo Inda «Real»ning sobiq bosh murabbiyi Zinedin Zidan faoliyatini qayerda davom ettirishi mumkinligi haqida ma'lumot berdi.

«Yaqingacha Zidanda ikki klubdan jiddiy taklif bor edi – «Manchester Yunayted» va «PSJ»dan. Parijliklar klubi taklifi nisbatan yaxshiroq variant edi, ular unga kart-blansh taqdim etishga tayyor.

Bir necha kun oldin Zidanga uchinchi taklif kelib tushgan – «Bavariya»dan. Keyingi mavsum uchun», – degan Inda El Chiringuito dasturi efirida.

Ayni vaqtda «Bavariya»da ahvol og‘irlashgan. Yangi mavsumni yangi bosh murabbiy Niko Kovach bilan boshlagan myunxenliklar jamoasi 11 turdan keyin 5-o‘rinda bormoqda, jamoa birinchi o‘rindagi «Borussiya» Dortmunddan 7 ochko ortda qolib ketgan.

2016 yilning yanvaridan 2018 yil iyunigacha Madrid klubini boshqargan Zinedin Zidan klubi bilan 3 marta ketma-ket Chempionlar ligasi g‘olibi bo‘ldi va bir marta Ispaniya chempionligini qo‘lga kiritdi. U o‘tgan mavsum so‘ngida faoliyatida tanaffus qilishga qaror qildi.