Sankt-Peterburgdagi shifoxonadan chaqaloqni o‘g‘irlab ketgan O‘zbekiston fuqarolari qo‘lga olindi

Sankt-Peterburgda yangi tug‘ilgan chaqaloqni shifoxonadan o‘g‘irlashda gumon qilingan O‘zbekistonning ikki nafar fuqarosi qo‘lga olindi.

Rossiya Tergov qo‘mitasining Sankt-Peterburg bo‘yicha boshqarmasi matbuot xizmati xabariga ko‘ra, 55 yoshli ayol va uning 36 yoshli qizi 20 sentabr kuni hamyurti tomonidan dunyoga keltirilgan qiz chaqaloqni o‘g‘irlab ketishgan.

Tergov harakatlari davomida chaqaloq gumonlanuvchilarning yashash joyidan topilgan. U hozir bolalar shifoxonasida. 

Eslatib o‘tamiz, 16 noyabr kuni O‘zbekistonning 24 yoshli fuqarosi Moskva tumani politsiyasiga murojaat qilgan. Uning so‘zlariga ko‘ra, 20 sentabr kuni Ordjonikidze ko‘chasidagi tug‘ruqxonada qiz farzandni dunyoga keltirgan. Ro‘yxatdan o‘tmagani va oqibatlardan qo‘rqqani tufayli ayol 36 yoshli vatandoshining hujjatlaridan foydalangan. Har ikki ayolning tashqi qiyofasi juda o‘xshashdir.

Dunyoga kelgan qiz kasal ekani aniqlandi: yurak porogi. Chaqaloqni Avangard ko‘chasidagi 1-sonli bolalar shifoxonasiga olib borishgan. Biologik onaning so‘zlariga qaraganda, 14 noyabr kuni ertalab hamyurti kasalxonaga kelib, bolani jonlantirish bo‘limidan olib ketgan. Unga rad javobi berishning iloji bo‘lmagan: sababi hujjatlar bo‘yicha aynan u chaqaloq onasidir.