Rossiyaning Sankt-Peterburg shahridagi doʻkonlar, goʻzallik va massaj salonlari hamda sartaroshxonalarga 2026-yil oxirigacha chet elliklarni patent asosida ishga jalb qilish taqiqlandi, deb xabar berdi shahar maʼmuriyatiga tayanib Interfaks.
Cheklovlar Yevroosiyo iqtisodiy ittifoqiga aʼzo davlatlar (Belarus, Qozogʻiston, Armaniston, Qirgʻiziston) fuqarolariga hamda ishlash uchun ruxsatnomaga ega boʻlgan chet elliklarga, jumladan, yuqori malakali mutaxassislarga taalluqli boʻlmaydi.
Gubernator Aleksandr Beglovning qarori bilan 2026-yil uchun chet ellik ishchilarni patent asosida jalb qilish taqiqlangan faoliyat turlari roʻyxati kengaytirildi.
Xabarda aytilishicha, roʻyxatga chakana savdo, jismoniy tarbiya va sogʻlomlashtirish, tibbiyot sohasidagi ayrim yoʻnalishlar, shuningdek, goʻzallik salonlari va sartaroshlik xizmatlari bilan bogʻliq faoliyat turlari qoʻshilgan.
Tibbiyot sohasidagi faoliyat turlari qatorida, xususan, massaj salonlari va sanatoriylar faoliyati keltirilgan.
Tadbirkorlarga oʻz xodimlari sonini yangi talablarga muvofiqlashtirish uchun 15-dekabrgacha muhlat berildi.
Rasmiylar ushbu taqiq «ish oʻrinlari birinchi navbatda Rossiya fuqarolari, jumladan, yoshlar va talabalar uchun yaratiladigan shaffof hamda tartibga solinadigan mehnat bozorini» shakllantirishga yordam berishiga umid qilmoqda.
Avval xabar qilinganidek, 2025-yil dekabr oyida Beglov 2026-yil oxirigacha migrantlarni patent asosida taksi haydovchisi va kuryerlik ishlariga jalb qilishni taqiqlash toʻgʻrisidagi qarorni imzolagan edi.
