Yevroittifoq Markaziy Osiyo bo‘yicha yangi strategiyani ishlab chiqadi

2018 yilning 23 noyabr kuni O‘zbekiston Respublikasi tashqi ishlar vaziri Abdulaziz Komilov boshchiligidagi delegatsiya Bryussel shahrida bo‘lib o‘tgan «Markaziy Osiyo – Yevropa ittifoqi» mintaqalararo vazirlar uchrashuvida ishtirok etdi. Bu haqda TIV xabar bermoqda.

Qirg‘iziston, Qozog‘iston, Tojikiston, Turkmaniston, O‘zbekiston va Yevroittifoq tashqi siyosat idoralari rahbarlari tomonidan siyosiy, iqtisodiy, investitsion sohalardagi, barqaror rivojlanish, iqlim o‘zgarishi, atrof-muhit, suv manbalari va xavfsizlik jabhalaridagi hamkorlikning hozirgi holati va istiqbollarini batafsil muhokama qilindi.

Markaziy Osiyo davlatlari vakillari 2019 yil so‘ngiga qadar Markaziy Osiyo bo‘yicha yangi strategiyani ishlab chiqish va qabul qilish borasidagi YeIning qarorini qo‘llab-quvvatladilar hamda uning samaradorligini oshirish bo‘yicha aniq takliflar berdilar.

Yalpi majlislar va boshqa shakldagi uchrashuvlar chog‘ida mintaqaviy va xalqaro siyosat masalalari yuzasidan fikr almashildi.

Eslatib o‘tamiz, avvalroq Abdulaziz Komilov Federika Mogerini bilan uchrashgani, hamkorlik bo‘yicha yangi bitim loyihasi taqdim etilgani xabar berilgandi.