Yevrokomissiya mulozimi Rossiyani Yevropadagi yolg‘on axborotning asosiy manbai deb atadi

Yevrokomissiya rahbari o‘rinbosari Andrus Ansip "ishonchli dalillar" Rossiyani Yevropadagi yolg‘on axborotning asosiy manbai ekanligini ko‘rsatayotganligini ma'lum qildi.

Ansipning so‘zlariga ko‘ra, asosiy vazifalaridan biri "Rossiyaning dezinformatsiya kampaniyasiga qarshi kurashish" bo‘lgan East StratCom Task Force operativ guruhi Yevroittifoqqa qarshi 4,5 mingdan ortiq yolg‘on axborot tarqatilishi holatlarini aniqlagan.  
"East StratCom Task Force 2015 yilda tashkil etilganidan buyon 4,5 mingdan ortiq yolg‘on axborot tarqatilishi holatlarini aniqladi va tahlil qildi. Rossiya Yevropadagi yolg‘on axborotning asosiy manbai ekanligini ko‘rsatuvchi ishonchli dalillar mavjud", — dedi Ansip jurnalistlarga.

Yevrokomissiya dezinformatsiyaga qarshi kurashish chora-tadbirlari rejasi doirasida East StratCom Task Force xodimlarini ko‘paytirish uchun byudjyetni 2019 yilda 1,9 million yevrodan 5 million yevrogacha oshirishni taklif qilmoqda.

Ushbu reja YeIning 13-14 dekabrda Bryusselda bo‘lib o‘tadigan sammitida tasdiqlash uchun taqdim etiladi.