Turkmaniston o‘z ijtimoiy tarmog‘ini ishga tushirdi. Boshqa barcha ijtimoiy tarmoqlar bloklandi

Turkmanistonda «Biz byarde» («Biz shu yerdamiz», qisqacha nomi - «Bi-Bi») nomli ijtimoiy tarmoq ishga tushirildi. Bu haqda 23 dekabr kuni Orient nashri xabar tarqatdi.

Rasmiy taqdimot oldidan «Bi-Bi» ilovasi 5 mingdan ortiq Android foydalanuvchisi tomonidan yuklab olindi.

Ijtimoiy tarmoq tezkor xabarlar, fayllar bilan almashish, barcha ko‘radigan xabarlarni yaratish, ularga fotosuratlar, videolar va boshqa fayllarni biriktirish imkonini beradi. Shuningdek, sayt va ilovada oldi-sotdi bo‘yicha e'lonlar uchun ham funksiyalar nazarda tutilgan, ularni nafaqat foydalanuvchining «do‘stlari», balki boshqa tashrif buyuruvchilar ham ko‘radi.

Ijtimoiy tarmoqdan foydalanish qoidalarida aytilishicha, foydalanuvchi yoshi kamida 13 bo‘lishi kerak. Akkauntidan e'lon qilingan har qanday ma'lumot uchun foydalanuvchi javob beradi. U boshqa foydalanuvchilarni haqorat qilmaslik, ortiqcha bezovtalikka sabab bo‘lmaslik va tahdid qilmaslikka majbur. Ta'kidlanishicha, ma'muriyat oldindan ogohlantirmasdan va tushuntirishsiz xizmatlar ko‘rsatishni to‘xtatib qo‘yish huquqiga ega.

Facebook, Twitter, Instagram, Odnoklassniki va VKontakte kabi xorijiy mashhur ijtimoiy tarmoqlar Turkmanistonda bloklab qo‘yildi. Blokni chetlab o‘tib, xorijiy ijtimoiy tarmoqlarda ro‘yxatdan o‘tgan kishilar maxsus xizmatlarga «suhbat uchun» chaqirilishi mumkin.