AQSH va Yevropa Rossiyada oʻlat tarqalishi haqidagi xabarlardan xavotirda

Jahon sogʻliqni saqlash tashkiloti (JSST) rahbari Tedros Adanom Gebreyesus tashkilot hozircha kasallik tarqalishi xavfini past deb baholayotganini bildirdi: «bu xavf Irkutsk uchun past, umuman Rossiya uchun past va JSST Yevropa mintaqasi uchun oʻta past». Shu bilan birga, u ushbu baholash Irkutsk viloyatida yuz bergan hodisa haqida toʻliq boʻlmagan maʼlumotlarga asoslanganini qayd etdi.

Uning soʻzlariga koʻra, laboratoriya xodimining rasmiy oʻlim sababi hali tasdiqlanmagan, laboratoriya tekshiruvlari davom etmoqda.

Rossiya hukumati JSST soʻroviga javoban soʻnggi vaqtlarda Irkutsk viloyatida birorta ham oʻlat holati qayd etilmaganini maʼlum qildi, dedi Gebreqyesus.

«Ular bemor bilan muloqotda boʻlganlar orasida yuqori xavf tugʻdiruvchi patogenlar aniqlanmaganini va aniqlangan barcha shaxslar ustidan tibbiy kuzatuv yakunlanganini maʼlum qildi», - dedi JSST rahbari.

Gebreqyesus JSST institut xodimining oʻlimiga olib kelgan qoʻzgʻatuvchi haqida «qoʻshimcha axborot soʻragani»ni taʼkidladi.

Shuningdek, u tashkilot institutning yana bir xodimida «kelib chiqishi nomaʼlum pnevmoniya» belgilari kuzatilgani haqidagi OAV xabarlarini tekshirayotganini qayd etdi.

Shu bilan birga, JSST davolanmagan taqdirda oʻpka oʻlati kasallik boshlanganidan soʻng bir sutka ichida oʻlimga olib kelishini, ammo oʻz vaqtida tashxis qoʻyilsa, «zamonaviy antibiotiklar bemor ahvolini tezda barqarorlashtira olishi»ni eslatib oʻtdi.

Oʻlatning oʻpka shakli odamdan-odamga havo-tomchi yoʻli orqali yuqadi va u qora oʻlatga qaraganda ancha xavflidir: JSST maʼlumotlariga koʻra, agar bemor zararlangandan keyingi dastlabki 24 soat ichida antibiotik olmasa, uning vafot etish ehtimoli 100 foizga yetadi.

Oʻpka oʻlatining alomatlari odatda 24 soat ichida yuzaga chiqadi, bubon va septik shakllarida esa yashirin davr odatda bir necha kun davom etadi.

«Oʻta xavfli infeksiya»

Rossiya rasmiylari bergan maʼlumotlarga koʻra, Irkutsk oʻlatga qarshi kurashish institutining 28 yoshli xodimi 29-sentabr kuni ogʻir pnevmoniya alomatlari bilan shifoxonaga yotqizilgan. U 1-oktabrdan 2-oktabrga oʻtar kechasi muqaddam kovid gospitali joylashgan Shelexov shahar shifoxonasida vafot etgan.

Bemor vafot etishi bilanoq Shelexov shifoxonasi karantinga yopildi, deb yozdi «Lyudi Baykala» nashri. Shuningdek, Irkutsk oʻlatga qarshi kurashish institutida ham karantin joriy etildi. Marhum bilan muloqotda boʻlganlar yakkalab qoʻyilib, bir nechta shifoxonalarga joylashtirildi, deb xabar berdi OAV. «REN-TV» telekanali gap institutning vafot etgan xodimi bilan muloqotda boʻlgan 200 ga yaqin odam haqida borayotganini qayd etgan, biroq telekanal oʻsha kuniyoq ushbu xabarni oʻchirib tashladi.

Xuddi shu kuni, 2-oktabrda Rossiya bosh davlat sanitariya vrachi Anna Popova Irkutskka bordi hamda Irkutsk viloyati rahbari Igor Kobzev bilan birgalikda hududda «oʻta xavfli infeksiya» bilan kasallanish holatiga shubha paydo boʻlgani sababli navbatdan tashqari yigʻilish oʻtkazdi.

OAV va telegram-kanallar manbalarga tayangan holda 25-sentabr kuni Darya Shipilova ish joyida ichida oʻlat qoʻzgʻatuvchisi boʻlgan probirkani sindirib qoʻygani haqida yozdi. Biroq rasmiylar bu maʼlumotni rasmiy darajada tasdiqlamadi. 4-oktabr kuni «Rospotrebnadzor» oʻlatga qarshi kurashish institutida ishlagan ikkita komissiya xulosasiga tayanib: «Patogen mikroorganizmlar bilan ishlashda hech qanday avariya holatlari aniqlanmadi», deb bayonot berdi.

Rasmiy talqinga koʻra, institutning vafot etgan xodimiga «etiologiyasi noaniq pnevmoniya» tashxisi qoʻyilgan. «Rospotrebnadzor» «bemorning biologik materialida uning kasbiy faoliyati bilan bogʻliq mikroorganizmlar aniqlanmagani»ni taʼkidladi.

«U bilan muloqotda boʻlganlarning hech birida yuqumli patologiyaga xos salomatlik oʻzgarishlari aniqlanmadi», - deb bildirdi Rossiya idorasi.

Laborant ayolning oʻlimiga sabab boʻlgan patogenning ehtimoliy xavfidan mahalliy hokimiyatning ayrim bayonotlari hamda xatti-harakatlari ham darak berib turgan boʻlishi mumkin. Xususan, oʻtgan haftada Irkutsk viloyatidagi Baykalsk shahri maʼmuriyati oʻzining telegram-kanalida oʻsha paytda «xavfli infeksiya» qayd etilgani gumon qilinayotgan Shelexov shahriga bormaslikka chaqiruvchi post eʼlon qildi. Mazkur xabarga «Lyudi Baykala» nashri eʼtibor qaratdi.

Shelexov tumani rasmiylari avvalroq mahalliy shifoxona karantinga yopilganini maʼlum qilgan, koʻp oʻtmay esa Irkutsk viloyati rahbari Igor Kobzev mintaqada «oʻta xavfli infeksiya» bilan kasallanish holatiga shubha paydo boʻlganini aytgan edi.

Matbuotda 28 yoshli laborant ayol goʻyoki Tailanddan qaytgani haqida xabarlar urchidi, boshqa manbalar esa uning Buryatiyaga xizmat safariga borganini tilga oldi.

Keyinroq Buryatiya rahbari Aleksey Sidenov «oʻlatdan vafot etgan ayol» mintaqaga kelmagani haqida post yozdi. Soʻngra postni tahrirlab, uni «katta ehtimol bilan oʻlatdan vafot etgan ayol» deb atadi.

Soʻnggi kunlarda hokimiyat organlari «xavfli infeksiya» oʻpka oʻlati qoʻzgʻatuvchisi ekanini izchil ravishda inkor etib kelmoqda.

Bundan tashqari, Irkutsk oʻlatga qarshi kurashish instituti ikki haftadan soʻng - 21 va 22-oktabr kunlari mintaqa markazida MDH mamlakatlarining «Hududlarni oʻlat va boshqa xavfli yuqumli kasalliklar chetdan kirib kelishi hamda tarqalishidan sanitariya jihatidan muhofaza qilishning dolzarb muammolari» mavzusidagi Davlatlararo konferensiyasini oʻtkazishni rejalashtirmoqda.

Mehmonlarning oʻnta poytaxt - Pekin, Ulan-Bator, Minsk, Boku, Yerevan, Toshkent, Bishkek, Ostona, Ashxobod va Dushanbedan kelib-ketish yoʻl xarajatlari, shuningdek, viza, tibbiy sugʻurta va xitoy tilidan tarjima xizmati haqi toʻlab beriladi.

Konferensiya bekor qilingani yoki qoldirilgani haqida xabar berilmadi.