BAAda 50 yil ichida biror marta qoida buzmagan haydovchi topildi

BAAda 50 yil ichida biror marta yo‘l harakati qoidalarini buzmagan haydovchi topildi. Bu shaxs 78 yoshli Said Rashid Ahmad Bolxun bo‘lib, u haydovchilik guvohnomasini 1969 yilda olgan. Ras-Al-Hayma amirligi politsiyasi bu o‘ziga xos natijani maxsus sovg‘a bilan qayd qildi.

Amirlik politsiyasining markaziy tezkor boshqarmasi bosh direktori Muhammad Said Al-Humoiy Bolxun misoli haydovchilarni “qoidalarga amal qilish”ga undashda yordam berishini aytgan. Bolxunning o‘g‘li otasining ushbu natijasini Ginness rekordlar kitobida qayd qilish lozimligini aytgan.

BAAda batartib haydovchilik uchun rag‘batlantirish tizimi – “oq ballar” mavjud. Haydovchi jarimasiz yurgan har bir oy uchun 2 ball oladi. Haydovchilar kichik qoidabuzarliklar uchun jarimani shu ballar yordamida to‘lashlari, agarda yil davomida 24 ball yig‘salar, politsiya departamenti tomonidan turli sovg‘alar bilan taqdirlanishlari mumkin.

Jumladan, joriy yil bahorida Dubay politsiyasi ikki nafar saranjom haydovchiga sof oltindan yasalgan o‘yinchoq mashinalar sovg‘a qilgan.

Biroq dunyoda buning aksiga misollar ham talaygina. Misol uchun, Germaniyada 18 yoshli o‘smir haydovchilik guvohnomasini olgandan 49 daqiqa o‘tiboq undan mahrum etilgan. U guvohnomani olish uchun imtihonni muvaffaqiyatli topshirgach, buni do‘stlari bilan nishonlashga qaror qilib, ikki marta tezlikni belgilangan me'yordan oshirgan.