Diplomat Magazine: O‘zbekiston xorijiy investitsiyalar va turizm uchun ochiq

Diplomat Magazine nashrida O‘zbekiston investitsiyalar uchun ochilayotgani haqidagi maqola chop etildi. Jumladan, unda 19-20 noyabr kunlari Toshkentda bo‘lib o‘tgan I Xalqaro investitsion forum haqida so‘z yuritilib, mamlakatda turizm sohasiga investitsiyalar jalb qilish masalasiga e'tibor qaratilgan.

Nashrning Turizmni rivojlantirish davlat qo‘mitasi raisi Abdulaziz Akkulovning so‘zlariga asoslanib yozishicha, O‘zbekiston 2019 yilda sayyohlar sonini ikki baravarga oshirishi kutilmoqda. Manbada O‘zbekiston Osiyo javohiri ekani ta'kidlangan.

Unda O‘zbekiston hukumati butun mamlakat bo‘ylab 500 dan ziyod turistik loyiha haqida e'lon qilgani, bu loyihalardan mehmonxonalar, restoranlar, ko‘ngilochar maskanlar, mavzuiy parklar, sport markazlari, xususiy shifoxonalar va boshqalarni o‘z ichiga olgani, hukumat xorijiy sarmoyadorlarga yer uchastkasi va imtiyozlar taqdim etayotgani ma'lum qilingan.

"Davlat investorlarga qulay imtiyozlar va kafolatlar taqdim etmoqda. Ular zarur joyda suv, elektr va gaz ta'minoti bilan ta'minlanadi", - deyiladi manbada.

Manbada turizmni rivojlantirish O‘zbekiston hukumati oldidagi asosiy ustuvor vazifalardan biri ekanligi ta'kidlangan. Prezident Shavkat Mirziyoyev mamlakatni dunyo uchun ochmoqda, deyiladi unda.

Nashr muxbirlarining 2018 yilning noyabrida Samarqand bozorida o‘tkazgan so‘rovnomasiga ko‘ra, mahalliy aholi Shavkat Mirziyoyev davlat rahbari bo‘lganidan keyin uning tashabbusidagi islohotlar natijasida turmush yaxshilanganini e'tirof etgan.

Diplomat Magazine O‘zbekiston sayyohlar va investorlarga eng avvalo xavfsizlik taqdim etayotgani, o‘zbek xalqi sayyohlarga yordam ko‘rsatish borasida juda mehmondo‘st ekani qayd etilgan.

Shuningdek, eksport mahsulotlari, hamyonbop jamoatchilik transporti, samarali xizmat ko‘rsatuvchi sog‘liqni saqlash tizimi, ijtimoiy va siyosiy barqarorlik O‘zbekistonning ustuvor jihatlari qatorida sanab o‘tilgan.

O‘zbekistonning Benilyuks mamlakatlaridagi elchisi Dilyor Hakimovning Diplomat Magazine nashriga bergan intervyusida ta'kidlanishicha, 2018 yilda O‘zbekiston YaIM 5,2 foizni tashkil qilgan bo‘lsa, 2019 yilda bu ko‘rsatkich 5,4 foizga yetishi kutilmoqda. Inflatsiya o‘tgan yili 16-17 foiz bo‘lgan bo‘lsa, 2019 yilda - 13,5-15,5 foiz, 2020 yilda esa 10-12 foizni tashkil qilishi kutilmoqda. So‘nggi ikki yilda O‘zbekiston 17 milliard dollarlik 182 investitsion loyihani amalga oshirishga doir shartnoma imzolagan.

Intervyuda O‘zbekiston 2030 yilga borib Global innovatsiya indeksining top-50 ro‘yxatiga kirishni rejalashtirayotgani qayd etilgan.

Xorijiy investitsiyalar jalb qilinayotgan asosiy sohalar sifatida neft va gaz, to‘qimachilik, farmatsevtika, avtomobilsozlik, qishloq xo‘jaligi, qayta ishlash, qurilish materiallari, elektrotexnika materiallari, kimyo sanoati, turizm va boshqalar keltirilgan.

Intervyuda O‘zbekiston vakili mamlakat turizmni jadal rivojlantirish, hududlar turistik salohiyatidan samarali foydalanish va ishchi o‘rinlari yaratish, yangi milliy turistik mahsulotlarni shakllantirishda maqsadli ishlarni davom ettirishi haqida ma'lum qilgan.

"Inflatsiya darajasini pasaytirish, faol tadbirkorliklarni har tomonlama qo‘llab-quvvatlash va investorlar uchun keng sharoitlar yaratishga doir ishlarni davom ettiramiz", - deydi Dilyor Hakimov.

Shuningdek, u O‘zbekistondagi soliq islohotlari va Harakatlar strategiyasi yo‘nalishlari bo‘yicha olib borilayotgan ishlar haqida ham so‘z yuritgan.

Bundan avval Kun.uz'da The New York Times O‘zbekistonni 2019 yilda sayohat qilish kerak bo‘lgan yo‘nalishlar ro‘yxatiga qo‘shgani haqidagi maqola taqdim etildi.