Ahmad bin Said bin Umar al-Kasiriy Ummonning O‘zbekistondagi elchisi bo‘ldi

2019 yilning 16 yanvar kuni O‘zbekiston Respublikasi tashqi ishlar vaziri Abdulaziz Komilov Ummon Sultonligining favqulodda va muxtor elchisi etib tayinlangan Ahmad bin Said bin Umar al-Kasiriyni qabul qildi.

TIV xabariga ko‘ra, ishonch yorliqlari nusxasini qabul qila turib, vazir elchini iliq qarshi olgan, O‘zbekiston va Ummon o‘rtasidagi munosabatlarni mustahkamlash borasidagi ishiga muvaffaqiyat tilagan.

Suhbat davomida o‘tgan yilning sentabr oyida Maskat shahrida mamlakatimiz elchixonasi ochilishi O‘zbekiston – Ummon muloqotiga tizimlilik va o‘suvchanlik tusini berish imkonini yaratishiga ishonch bildirildi.

Uchrashuvda siyosiy, savdo-iqtisodiy, investitsion, madaniy-gumanitar va boshqa jabhalardagi hamkorlikning istiqbollari hamda 2019 yildagi qo‘shma tadbirlarning jadvali va kun tartibi borasida fikr almashildi.