Nukus aeroportida «Ochiq osmon» rejimi joriy etilmoqda

O‘zbekiston Respublikasi hududlari, xususan, Qoraqalpog‘iston hududi ijtimoiy-iqtisodiy mavqeini yuksaltirish maqsadida, Nukus aeroportida «Ochiq osmon» rejimi joriy etilmoqda. Bu haqda Davavianazorat matbuot xizmati xabar berdi.

Ushbu rejimga muvofiq, havo qatnovi to‘g‘risidagi hukumatlararo Bitimlar asosida tayinlangan xorijiy aviakompaniyalarga parvozlar sonini 
Nukus aeroportiga cheklovsiz amalga oshirish imkoni beriladi. 

Parvozlar havoning 5-erkinlik huquqisiz qayd etilgan Bitimlar doirasida Nukus aeroporti texnik imkoniyatlarini hisobga olgan holda amalga oshiriladi. 

Nukus aeroportida «Ochiq osmon» rejimi IATA (Havo transporti xalqaro assotsiatsiyasi) «2019 yil-Yoz mavsumi»dan boshlab IATAning «2021-2022-Qish mavsumi»gacha amal qiladi. 

Ushbu masala bo‘yicha Parvozlar xavfsizligini nazorat qilish davlat inspeksiyasining O‘zbekiston Respublikasi bilan havo qatnovi sohasida xalqaro shartnomalar imzolagan xorijiy davlatlarning aviatsiya ma'muriyatlariga diplomatik kanallar orqali tegishli bildirishnomalari yuborilgan.