Prezident Shavkat Mirziyoyev 7-oktabr kuni Taʼlim va ilm-fan vazirligi faoliyatini tashkil etish hamda taʼlim tizimining barcha bosqichlarida amalga oshirilishi lozim boʻlgan ustuvor vazifalar yuzasidan taqdimot bilan tanishdi.
Yaqinda prezident farmoni bilan Maktabgacha va maktab taʼlimi vazirligi hamda Oliy taʼlim, fan va innovatsiyalar vazirligi yagona Taʼlim va ilm-fan vazirligi sifatida qayta tashkil etildi. Bundan koʻzlangan maqsad taʼlim, tarbiya va ilm-fanning yaxlit tizimini shakllantirish, taʼlim sifati va samaradorligini oshirish, inson kapitalini rivojlantirish ishlarini yangi bosqichga olib chiqishdir.
Yangi vazirlik oldiga maktabgacha taʼlimdan oliy taʼlimgacha boʻlgan bosqichlar va ilmiy faoliyat oʻrtasida uzviylikni taʼminlash, tizimni yagona yondashuv asosida boshqarish vazifasi qoʻyilgan. Bunda taʼlim mazmunini zamon va mehnat bozori talablariga moslashtirish, raqobatni rivojlantirish, xususiy sektor ishtirokini kengaytirish hamda sohaning jamoatchilik oldidagi hisobdorligini oshirish muhim ahamiyatga ega.
Taqdimotda yangi vazirlik faoliyatini joylardagi haqiqiy holatga tayanib tashkil etish, takrorlanuvchi vazifalarni qisqartirish va hududiy boʻgʻinlar masʼuliyatini kuchaytirish masalalari koʻrib chiqildi. Boshqaruvni raqamlashtirish va tahliliy salohiyatni oshirish qarorlarni ishonchli maʼlumotlar asosida qabul qilishga xizmat qilishi taʼkidlandi.
Maktabgacha taʼlimda bolani har tomonlama rivojlantirish, dastur va metodikalarni yangilash hamda tarbiyachilar malakasini oshirishga eʼtibor qaratildi. Shuningdek, bolalarning qiziqish va qobiliyatlarini erta aniqlash, taʼlim muassasalarida zamonaviy sharoitlar yaratish boʻyicha takliflar bildirildi.
Maktab taʼlimida darsliklarni yangilash, oʻquvchilarning bilim va amaliy koʻnikmalarini izchil rivojlantirish hamda ularni baholash tizimini takomillashtirish masalalari muhokama qilindi. Pedagoglarga metodik yordam koʻrsatishda sunʼiy intellektdan foydalanish, ayrim maktablarda ingliz tilida taʼlim berish tajribasini oʻtkazish va xususiy sektor ishtirokini kengaytirish taklif etildi.
Kasbiy taʼlim boʻyicha yoshlarning qiziqishlarini erta aniqlash, texnikumlar dasturlarini mehnat bozori talablariga moslashtirish va ularning moddiy bazasini mustahkamlashga alohida ahamiyat berildi. Korxonalar bilan hamkorlikda dual taʼlimni kengaytirish, xalqaro dasturlar va zamonaviy oʻquv materiallarini joriy etish masalalari koʻrib chiqildi.
Oliy taʼlimda universitetlar mustaqilligini kengaytirish, boshqaruv sifatini va rahbarlarning natija uchun masʼuliyatini oshirish taklif qilindi. Shu bilan birga, yetakchi xorijiy oliygohlar bilan hamkorlikni rivojlantirish, taʼlimni ishlab chiqarish bilan yaqinlashtirish va talabalarning amaliy tayyorgarligini kuchaytirish masalalari muhokama qilindi.
