Urganch xalqaro aeroportida yangi yoʻlovchi terminalini qurish boʻyicha dastlabki ishlar boshlandi. Ayni paytda qurilish maydonida kotlovan qazilmoqda. Bu haqda Kun.uz muxbiri qatnashgan press-turda maʼlum qilindi.
Qurilish ishlarini olib borayotgan Bomi Engineering & Construction kompaniyasi vakili Xvan Yongjening Kun.uzʼga aytishicha, keyingi bosqichda qoziq qoqish ishlari boshlanadi.
«Hozir qurilishning dastlabki bosqichidamiz, kotlovan qazish ishlari boshlandi. Keyingi bosqichda qoziq qoqish ishlari olib boriladi. Aeroport qurilishini 2028-yil oxirigacha yakunlashni rejalashtirganmiz», - dedi u.
Modernizatsiya loyihasining umumiy qiymati 242 mln dollarga baholangan. Shundan 134 mln dollari xususiy sherik, 108 mln dollari davlat sherigi obyektlariga toʻgʻri keladi.
Loyiha Janubiy Koreyaning Incheon International Airport Corporation kompaniyasi ishtirokida davlat-xususiy sheriklik asosida amalga oshirilmoqda. Kompaniya 2025-yil aprelida oʻtkazilgan xalqaro tenderda gʻolib boʻlgan.
Kelishuv 22 yilga moʻljallangan boʻlib, uning 3 yili qurilish, 19 yili konsessiya davriga toʻgʻri keladi.
Loyihaning asosiy obyektlaridan biri qariyb 39 ming kvadrat metr maydonga ega yangi yoʻlovchi terminali boʻladi. Amaldagi terminal maydoni 9,2 ming kvadrat metrni tashkil etadi.
Yangi terminal ishga tushgach, uning bir soatlik xizmat koʻrsatish quvvati 300 yoʻlovchidan 1300 nafargacha oshadi. Aeroport yiliga hozirgi 1,2 mln oʻrniga 3,5 mln nafargacha yoʻlovchiga xizmat koʻrsata oladi.
Terminalda xalqaro va ichki reyslar yoʻlovchilari oqimi ajratiladi. Roʻyxatdan oʻtish, tekshiruv va bagaj bilan ishlash zonalari, VIP va CIP zallar, Duty Free savdo maydonlari hamda ovqatlanish shoxobchalari tashkil etiladi.
Xvan Yongjening aytishicha, yangi terminal dizaynida Xorazm meʼmorchiligiga xos elementlardan foydalaniladi.
Qurilish davomida aeroport faoliyati toʻxtatilmaydi. Yoʻlovchilarga xizmat koʻrsatish uchun qurilgan vaqtinchalik uchib kelish terminali 2026-yil avgustida aeroport foydalanishiga topshirilgan.
Modernizatsiya aerodrom infratuzilmasini ham qamrab oladi. Samolyotlar turish joylari 6 tadan 18 tagacha, yurish yoʻlaklari soni esa 4 tagacha koʻpaytiriladi. Shuningdek, 3300 metr uzunlikdagi yangi uchish-qoʻnish yoʻlagi qurilishi rejalashtirilgan.
