00:56 / 20.01.2019
12852

«Arsenal» London derbisida «Chelsi»ni mag‘lub etdi

Foto: Getty Images

Angliya chempionati 23-tur markaziy o‘yini nihoyasiga yetdi. 

Unda «Arsenal» o‘z maydonida «Chelsi»ni qabul qilib, ishonchli g‘alaba qozondi – 2:0.

14-daqiqada Lyakazett hisobni ochgan bo‘lsa, ikkinchi gol 39-daqiqada Koselni tomonidan kiritildi. 

Mauritsio Sarri jamoasi raqib darvozasi tomon 13 zarba yo‘llagan, shundan faqat bittasi darvoza sohasiga to‘g‘ri borgan.  Birinchi bo‘limda «ko‘klar» darvoza tomon bitta ham aniq zarba yo‘llay olishmadi. Faqat 82-daqiqada Markos Alonso darvoza tomon zarba berdi, ammo Leno o‘zini ko‘rsatdi. Bu «Chelsi»ning Sarri boshqaruvidagi eng yomon ko‘rsatkichdir.

«Arsenal»da esa zarbalar soni jami 13tani tashkil etdi, shundan 5tasi Kepa Arrisabalaga qo‘riqlayotgan darvoza tomon to‘g‘ri bordi.

Qayd etish kerakki, o‘yinning ilk 14 daqiqasidayoq Unai Emeri shogirdlari ispaniyalik darvozabonni 5 marta bezovta qilishgan. Taqqoslash uchun, jamoa bir oy oldin «Brayton»ga qarshi kechgan o‘yin davomida atigi 7 zarba berishgandi.

Endilikda, beshinchi o‘rindagi «Arsenal» turnir jadvalida to‘rtinchi o‘rindagi «Chelsi»ni 3 ochkolik farq bilan ta'qib qilmoqda.

Angliya chempionati
23-tur

Arsenal – Chelsi 2:0
Gollar: 1:0 – 14 Lyakazett, 2:0 – 39 Koselni.
Arsenal – Leno, Papastatopulos, Kolashinats, Belerin (El-Nenni, 72), Koselni, Torreyra, Djaka, Genduzi, Remzi (Meytlend-Naylz, 67), Obameyang, Lyakazett (Ivobi, 68).
Chelsi – Arrisabalaga, Ryudiger, Alonso, Aspilikueta, David Luiz, Azar, Kante, Pedro (Xadson-Odoi, 80), Kovachich (Barkli, 63), Villian (Jiru, 68), Jorjino.
Ogohlantirishlar: David Luiz (37), Barkli (90).

Top