Estoniyada videoaloqa orqali nikoh tuzish va merosga ega bo‘lishga ruxsat berilmoqda

Estoniya parlamenti 30 yanvarda notarial guvohnoma to‘g‘risidagi qonun loyihasini ma'qulladi. Unga ko‘ra, notariuslarga oila qurish, nikohni bekor qilish, meros olishga kirishish yoki uni rad etish chog‘ida arizalarni videoaloqa orqali tasdiqlab olishga izn beriladi, deb xabar bermoqda mamlakat parlamenti matbuot xizmati.

Bu xizmatdan eng avvalo «elektron rezidentlar» — shaxsni tasdiqlovchi virtual hujjatga ega bo‘lgan, xorijda yashovchi 130 mingdan ortiq estoniyalik fuqaro manfaat topadi.

«Notariuslar endi nikohga kirishish yoki bekor qilish, meros olishga kirishish yoki uni rad etish, mas'uliyati cheklangan jamiyatdagi ulushni ajratib olish, shuningdek, mulkni garovga qo‘yish bilan bog‘liq ishonchnomalarni masofadan turib tasdiqlashlari mumkin», deyiladi xabarda.

Masofadan turib tasdiqlash uchun Notarial palata tomonidan maxsus dastur ishlab chiqilgan. Unga faqat identifikatsion ID karta yoki rezidentning shaxsini tasdiqlovchi hujjat bilan kirish mumkin.

Estoniyaning mamlakatdan tashqarida yashovchi fuqarolari bilan videoko‘prik orqali biror bitimni notarial tasdiqlash faqatgina Estoniya diplomatik vakolatxonalari ichidagina amalga oshiriladi. Tizimni sinovdan o‘tkazish davri uchun uchta diplomatik vakolatxona tanlangan: Xelsinki, Nyu-Dehli va Stokholmdagi. Yangilangan qonun 2020 yilning 1 fevralidan kuchga kiradi.