Hukumatning vakolatlari aniq tartibga solinadi

Vazirlar Mahkamasining “2019 yilda qonun loyihalarini ishlab chiqish va O‘zbekiston Respublikasi Oliy Majlisining Qonunchilik palatasiga kiritish dasturini tasdiqlash to‘g‘risida”gi qarori qabul qilindi.

Hujjat bilan 2019 yilda qonun loyihalarini ishlab chiqish va O‘zbekiston Respublikasi Oliy Majlisining Qonunchilik palatasiga kiritish dasturi tasdiqlandi.

Dasturga ko‘ra, “Vazirlar Mahkamasi to‘g‘risida”gi qonun loyihasi yangi tahrirda ishlab chiqiladi. 

Qonun loyihasida quyidagilar nazarda tutiladi:

Hukumatning vakolatlarini, ularni amalga oshirish mexanizmlarini aniq tartibga solish va iqtisodiy, moliyaviy, pul-kredit, investitsiya, ijtimoiy, madaniy-gumanitar, ta'lim, ilm-fan, sog‘liqni saqlash, ekologiya va boshqa sohalarda hamda tahlil qilish asosida tashqi iqtisodiy va tashqi siyosiy faoliyatda chuqur va tarkibiy qayta o‘zgartirishlar amalga oshirishni va yaqin, o‘rta va uzoq muddatli istiqbolda ularni strategik rivojlantirish modellari ishlab chiqilishi uchun uning mas'uliyatini oshirish;

Vazirlar Mahkamasi a'zolarining vakolatlari va javobgarligini belgilash;

Hukumatning O‘zbekiston Respublikasi Oliy Majlisi palatalari, O‘zbekiston Respublikasi prezidenti, O‘zbekiston Respublikasi prezidenti Administratsiyasi, sudlar, huquqni muhofaza qilish va harbiylashtirilgan tuzilmalar, nodavlat notijorat tashkilotlar va siyosiy partiyalar bilan o‘zaro hamkorligi masalalari;

Vazirlar Mahkamasi va uning Rayosati majlislarini o‘tkazish, ularning yakunlari bo‘yicha qarorlar qabul qilish reglamenti, shuningdek ularni o‘tkazish davomida ko‘rib chiqiladigan aniq masalalar ro‘yxatini belgilash;

Hukumat a'zolarini va Vazirlar Mahkamasi apparati xodimlarini moddiy va ijtimoiy ta'minlash masalalari.

Qonun loyihasini ishlab chiqish bo‘yicha mas'ul ijrochi - Adliya vazirligi, Vazirlar Mahkamasiga taqdim etish muddati - 2019 yil 10 aprel, Qonunchilik palatasiga kiritishning taxminiy muddati - 2019 yil 25 aprel.