Nigeriyaning Rivers shtatida mamlakat prezidenti Muhammadu Buxoriyning saylovoldi nutqidan keyin yuz bergan tiqilinchda kamida 14 kishi halok bo‘ldi. Bu haqda Vanguard nashri xabar berdi.
Nashr ma'lumotlariga ko‘ra, prezidentning saylovoldi mitingi Port-Xarkort shahridagi stadionda o‘tgan. Tiqilinch Buxoriy stadionni tark etgandan keyin boshlangan. Qurbonlarning ko‘pchiligi odamlar yopiq darvozalar orqali kuch bilan o‘tib ketmoqchi bo‘lganda oyoqlar ostida toptalib tashlangan.
“Men 14 qurbonni tasdiqlashim mumkin. Raqamlar o‘zgarishi mumkin. Qolgan jarohatlanganlar ortidan shifokorlar kuzatuv olib bormoqda”, deb aytgan Port-Xarkortdagi shifoxona vakili.
Nigeriyada milliy assambleya va prezident saylovlari 16 fevralda bo‘lib o‘tadi.
