10:44 / 27.02.2019
4809

Markazlashtirilgan manbalar hisobidan qora metallarni sotib olish osonlashdi

Foto: zavodkm.com

Hukumat kombinat markazlashtirilgan manbalar hisobidan moliyalashtiriladigan xaridorlarga to‘g‘ridan-to‘g‘ri shartnomalar asosida birja savdolarisiz sotadigan qora metallar prokatining hajmlarini tasdiqlaydi, deb yozmoqda Norma.
 
Eslatib o‘tamiz, prezidentning 18.12.2017 yildagi PQ–3438-son qarori 2-bandiga muvofiq, «O‘zmetkombinat» AJ tomonidan ishlab chiqarilgan qora metallar prokatini ajratish (yetkazib berish) faqat birja savdolari orqali amalga oshiriladi. Faqat takroriy birja savdolarida prokatga talab bo‘lmagan taqdirda uni to‘g‘ridan-to‘g‘ri shartnomalar bo‘yicha eksportga sotishga ruxsat beriladi.
 
2019 yil 23 fevraldan boshlab qoidadan istisno joriy etildi. «O‘zmetkombinat» AJ tomonidan ishlab chiqarilgan qora metallar prokati markazlashtirilgan manbalar hisobidan moliyalashtiriladigan iste'molchilarga to‘g‘ridan-to‘g‘ri shartnomalar bo‘yicha sotilishi mumkin. Ruxsat beriladigan hajmlarni Vazirlar Mahkamasi Iqtisodiyot va sanoat vazirligining taklifi bo‘yicha belgilaydi.
 
Yangilik markazlashtirilgan manbalar hisobidan moliyalashtiriladigan iste'molchilarga ham «Davlat xaridlari to‘g‘risida»gi Qonunda nazarda tutilgan xarid qilish tartib-taomillarini amalga oshirmaslikka ruxsat beradigan ko‘rinadi. Ilgari birja savdolari orqali xarid qilinadigan tovarlar Davlat buyurtmachilari tomonidan to‘g‘ridan-to‘g‘ri shartnomalar bo‘yicha xarid qilinadigan tovarlar (ishlar, xizmatlar) ro‘yxatiga kirishi sababli ular ham majburiy sanalmas edi.
 
Hujjat 23.02.2019 yildan kuchga kirdi.

Mavzuga oid
Top