Toshkentda xalqaro yuridik forum o‘tkaziladi. Unda ishtirok etish pulli tartibda amalga oshiriladi

Joriy yilning 25-27 aprel kunlari Toshkentda ilk bor xalqaro miqyosda «Tashkent Law Spring» yuridik forumi o‘tkaziladi. Bu haqida 4 mart kuni bo‘lib o‘tgan matbuot brifingida ma'lumot berildi.

Adliya vazirligi tashabbusi bilan «Huquq – jadal modernizatsiya davrida» mavzusida o‘tkazilayotgan forumda zamonaviy huquq tizimini rivojlantirish masalasi, yuridik nazariya va amaliyotdagi muammolar yuzasidan muhokamalar bo‘lib o‘tadi.

Forum dasturi doirasida uchta yo‘nalishda: «Sifatli davlat boshqaruvi», «Qonun ustuvorligini ta'minlash va sud-huquq tizimini isloh qilish», «Faol investitsiya siyosati» sessiyalari, shuningdek, 18ta parallel sessiya, notariat va sud-ekspertiza tizimi bo‘yicha ikkita davra suhbati hamda «Yuridik firma va advokaturani tashkil etishda qanday qilib muvaffaqiyatga erishish mumkin?» mavzusida mahorat darsi o‘tkaziladi.

Tadbirlar UzExpo markazida tashkillashtiriladi.

«Muhokamalarni huquq va investitsiyaga bog‘lagan holda o‘tkazishni rejalashtirganmiz. Chunki har qanday mamlakatga pul kiritishdan oldin xorijiy investor u yerdagi qonunchilik tizimi, qonunlarning amaliyotda qay darajada ishlashi bilan qiziqadi. Bu huquqshunoslar bilan hamkorlikda kechadigan jarayon», dedi Adliya vazirining birinchi o‘rinbosari Mahmud Istamov.

Shuningdek, tadbir doirasida «Yilning eng yaxshi advokati», «Yilning eng yaxshi advokatlik tuzilmasi», «Yilning eng yaxshi korporativ yuridik xizmati» nominatsiyalari bo‘yicha nomzodlar taqdirlanadi. Adliya vazirligining advice.uz bepul huquqiy-axborot portali taqdimoti ham kun tartibiga kiritilgan.

Forumda xorijiy mamlakatlarning adliya vazirlari, taniqli advokatlar, biznes vakillari, olimlar qatnashishi, shuningdek, spiker sifatida Vena xalqaro arbitraj markazi bosh kotibi Elis Fremut-Volf, Amerika-O‘zbekiston savdo palatasi raisi Kerolin Lemm, BMT Korrupsiyaga qarshi kurashish global dasturi maslahatchisi Angi Timilsin ham ishtirok etishi kutilmoqda.

Brifingda berilgan ma'lumotga ko‘ra, forumda ishtirok etish pulli tartibda amalga oshiriladi. Ishtirok uchun ikki turdagi: maxsus (900 000 so‘m – ishchi tadbirlar va oraliq kofe-breyklarni o‘z ichiga oladi) hamda to‘liq (2,5 million so‘m – barcha tadbirlar qatorida rasmiy kechki ovqatda qatnashish uchun) paket mavjud. Ishtirok etish barcha uchun ochiq tarzda tashkentlawspring.uz saytida ro‘yxatdan o‘tish orqali amalga oshiriladi. To‘lov 25 martga qadar yuqorida keltirilgan narxlarda, undan keyingi muddatlarda esa 10-15 foiz oshirilgan narxda o‘tkaziladi.

Mahmud Istamovga ko‘ra, muhokamalar natijasidagi xulosalardan milliy qonunchilik tizimini modernizatsiya qilishda foydalaniladi.

Forumda ishtirok eta olmaganlarga qulaylik yaratish maqsadida tashkentlawspring.uz saytida tadbirlarni onlayn translatsiya qilish rejalashtirilgan.

Xalqaro va mahalliy OAV vakillari forum uchun 4 martdan 15 aprelga qadar muddatda akkreditatsiyadan o‘tishi mumkin.