Mbappe Benzemaning rekordini yangiladi

Fransiya milliy jamoasi Yevro-2020 saralashining 2-turida Islandiyaga qarshi bahs olib borib, 4:0 hisobida g‘alaba qozondi. Parijdagi uchrashuvda Samyuel Umtiti, Olive Jiru, Kilian Mbappe va Antuan Grizmann bittadan gol muallifi bo‘lishdi va ularning har biri o‘ziga xos natija qayd etishdi.

12-daqiqada hisobni ochgan Umtitining o‘yin davomidagi 107ta pasidan barchasi manzilga aniq yetib bordi. Opta Spors ma'lumotiga ko‘ra, to‘p uzatishdagi 100 foizlik aniqlik oxirgi 10 yildan buyon Fransiya termasi a'zolarining hech birida kuzatilmagandi.

Samyuel milliy jamoada 2016 yili debyut qilgan va o‘shandan buyon 4ta to‘p kiritdi. Bu – shu vaqt davomida har qanday himoyachidan ikki barobarga yaxshiroq ko‘rsatkichdir.

Olive Jiru esa kechagi goli bilan «uchranglilar» to‘purarlari ro‘yxatida 3-o‘ringa chiqib oldi – endi uning hisobida 35ta gol bor. Undan oldinroqda faqat Mishel Platini (41ta gol) va Terri Anri (51ta gol) bormoqda.

Kechagi bahsda hisobni yirik ko‘rinishga keltirgan gol muallifi Kilian Mbappe shu o‘yinda ikkita golga assistentlik ham qildi. Squawka ma'lumotiga ko‘ra, uning ham klubdagi, ham terma jamoadagi rasmiy o‘yinlari soni 169taga yetdi. Bu bahslarda Kilian 91ta gol urib, 48ta golga uzatma bergan. Ya'ni, 20 yoshli hujumchi professional faoliyatining boshidan buyon har 83,5 daqiqada yo gol urmoqda, yo golga assistentlik qilyapti.

Islandiya bilan o‘yin Mbappe uchun Fransiya milliy jamoasi libosidagi 30-uchrashuv bo‘ldi. U bu chiziqni 20 yosh-u 3 oyligida kesib o‘tdi va bu borada rekordchi futbolchiga aylandi. Bundan avvalgi rekord Karim Benzemaga tegishli edi: u «uchranglilar» safidagi 30-o‘yinini o‘tkazganida 22 yoshga to‘lganiga 9 oy bo‘lgandi.

Dushanba oqshomida «Stad de Frans»dagi bahsga yakuniy nuqtani qo‘ygan Antuan Grizmann ham fransuzlar termasidagi statistikasini yaxshilab oldi. Endilikda u milliy jamoa to‘purarlari ro‘yxatida Yuriy Jorkayeff bilan birga 7-o‘rinda bormoqda – ularning hisobida 28tadan gol bor. 6-pog‘onadagi Jan-Per Papen 30ta, 4-5-o‘rinlardagi David Trezege va Zinedin Zidan 31tadan to‘p kiritgan. Top-uchlikda esa, yuqorida ta'kidlanganidek, Olive Jiru (35), Mishel Platini (41) va Terri Anri (51) borishmoqda.

Qayd etish kerak, Fransiya termasi kechagi o‘yinda mamlakat futbol federatsiyasi tashkil etilganiga 100 yil to‘lishi munosabati bilan retro-formada maydonga tushdi. FFF bir asrlik yubileyini 7 aprelda nishonlaydi.

Eslatib o‘tamiz, Dide Desham qo‘l ostidagi jamoa o‘tgan hafta saralashning ilk turida Moldova darvozasiga ham to‘rtta to‘p kiritgandi (4:1). UYeFA rasmiy saytida ta'kidlanishicha, fransuzlar 6 yil ichida ilk marotaba ketma-ket ikkita o‘yinda kamida to‘rttadan to‘p kiritishning uddasidan chiqdi.

2-turdan keyin «H» guruhida amaldagi jahon chempionlari yetakchilik qilmoqda. Shuningdek, Turkiya hisobida ham 6 ochko mavjud.